اسلام آباد( نئی تازہ رپورٹ) اسلام آباد ہائی کورٹ نے افغان خاتون کا سیاسی پناہ کا حق تسلیم کرتے ہوئے کیس خارج کرنے کا حکم دے دیا۔
افغان خاتون کے خلاف پاکستانی ویزا نہ ہونے کے الزام میں مقدمہ تھا ، عدالت نے مقدمہ خارج کرتے ہوئے کہا کہ آئین پاکستان سیاسی پناہ یا اسائلم کے حق کو تسلیم کرتا ہے۔
پائی کورٹ کے جسٹس بابر ستار نے افغان خاتون راحیل عزیزی کے خلاف فارنرز ایکٹ کے تحت درج مقدمے کے خلاف درخواست پر تفصیلی فیصلہ جاری کردیا، عدالت نے سیکرٹری داخلہ کو خاتون کو آسٹریلیا جانے کے لیے اجازت نامہ دینے کا حکم جاری کیا۔ عدالت نے 9 ماہ جیل میں رہنے والی خاتون کے خلاف درج مقدمہ بھی ختم کردیا۔
تفصیلی فیصلے میں کہا گیا کہ سیاسی پناہ یا اسائلم کے متلاشی افراد کو جیل نہیں بھیجا جا سکتا۔ طالبان کے اقتدارسنبھالنے کے بعد راحیل عزیزی کی جان کو افغانستان میں خطرات لاحق تھے۔ وہ جان پچانے کے لیے پاکستان آئی تھی۔ اسی بنیاد پر افغان خاتون کو آسٹریلیا کی حکومت ویزا دے چکی ہے۔
فیصلے میں کہا گیا ہے کہ پاکستان میں درج مقدمے کی وجہ سے افغان خاتون آسٹریلیا نہیں جا سکی ۔ راحیل عزیزی کیخلاف فارنرز ایکٹ کے تحت مقدمہ نہیں چلایا جاسکتا ۔ سیکرٹری داخلہ خاتون کو آسڑیلیا جانے کے لیے اجازت نامہ دیں۔
واضح رہے کہ خاتون کیخلاف ایف آئی اے نے سیکشن 14 فارنرز ایکٹ کے تحت مقدمہ درج کیا تھا۔
