لندن ( نئی تازہ نیوز).وفاقی وزیر داخلہ رانا ثنا اللہ نے کہا ہے کہ انہیں نواز شریف نے مشاورت کے لئے بلایا ہے، ساتھ کھڑے رہنے والوں کو ہی الیکشن میں ٹکٹ دیا جائے گا،عمران خان کی گرفتاری ہونی چاہیے۔ وہ ملک کو دیوالیہ کرنے کی مہم چلا رہا ہے۔
نجی ٹی وی کے مطابق رانا ثنا اللہ نے لندن کے ہیتھرو ایئر پورٹ پر میڈیا سے گفتگو کرتے ہوئے کہا کہ نواز شریف نے مشاورت کے لئے بلایا ہے۔رانا ثنا اللہ نے کہا کہ عمران خان سیاسی عدم استحکام پیدا کرنا چاہتا ہے، وہ پارلیمنٹ میں نہیں آنا چاہتا، گند کرنا چاہتا ہے۔ انہوں نے کہا کہ عمران خان کے کرتوت سامنے آ گئے ہیں، اس نے جھوٹے مقدمات بنائے،اداروں کو بلیک میل کیا۔ پورا توشہ خانہ چوری کرکے بیچ دیا اور اب ملک کو دیوالیہ کرنے کی مہم چلا رہا ہے، اس کی گرفتاری ہونی چاہیے۔
وزیر داخلہ نے کہا کہ قومی اسمبلی اپنی آئینی مدت پوری کرے گی ، ہم پنجاب اسمبلی کے الیکشن کے لئے تیار ہیں پنجاب میں اگلا وزیر اعلی مسلم لیگ ن سے ہوگا اور ہمارے ساتھ کھڑے رہنے والوں کو ہی الیکشن میں ٹکٹ دیا جائے گا۔ انہوں نے کہا کہ نواز شریف کا وطن واپسی پر فقید المثال استقبال ہوگا۔ایک سوال کے جواب میں رانا ثنا ء اللہ نے کہا کہ مریم نواز کی قیادت میں کام کرنے پر تیار ہوں، مسلم لیگ ن پنجاب کا صدر ہوں، اگر استعفی مانگا گیا تو نواز شریف کو دیدوں گا۔
