اسلام آباد: ضلع انتظامیہ نے پیمانوں میں ردوبدل اور مشکوک الیکٹرانک ڈیوائسز ملنے پر 4 پیٹرول پمپس کے خلاف مقدمات درج کر کے این او سی منسوخ کرنے کی کارروائی شروع کر دی ہے۔
یہ کارروائی دارالحکومت کے 43 فلنگ اسٹیشنز کی چیکنگ کے بعد کی گئی۔ حکام نے 14 اسٹیشنز پر پیمائش میں بے ضابطگیوں کی تصدیق کی، جس کے نتیجے میں 42 ڈسپنسنگ نوزلز کو فوری طور پر سیل کر دیا گیا۔ جبکہ بقایا 29 پیٹرول پمپس کی پیمائش معیاری تقاضوں کے مطابق پائی گئی۔
کارروائی کے دوران برآمد ہونے والی غیر قانونی الیکٹرانک ڈیوائسز کے ذریعے پیٹرول ڈسپنسر کی میٹر اسکرین پر گاڑیوں میں ڈالے گئے واقعی پیٹرول سے زیادہ مقدار ظاہر کی جاتی تھی۔
اس سے قبل جمعہ کے روز، انسپکشن ٹیموں نے ظاہر کی گئی مقدار کی نسبت پیٹرول کی کم مقدار فراہم کرنے پر 6 پیٹرول پمپس اور 40 سے زائد نوزلز کو سیل کیا تھا۔ ملوث عملے کے افراد کو موقع پر ہی گرفتار کر لیا گیا۔
ڈپٹی کمشنر اسلام آباد نے ٹیموں کو ہدایت کی ہے کہ وفاقی دارالحکومت میں قائم ہر پیٹرول اسٹیشن کی جانچ پڑتال کی جائے تاکہ صارفین کو کم پیمائش سے بچایا جا سکے اور معیارات کی خلاف ورزی کرنے والے مالکان کے خلاف سخت قانونی کارروائی کی جائے۔
