کراچی ( نئی تازہ مانیٹرنگ) قانون نافذ کرنے والے ادروں نے ڈالرکی ذخیرہ اندوزی کے خلاف سخت ایکشن کی تیاری کر لی، ایف آئی اے کی مدد ذخیرہ اندوزی میں ملوث مافیا کے گھروں پر چھاپے مارے جائیں گے۔
نجی ٹی وی نے ذرائع کے حوالے سے بتایا کہ ڈالر کی ذخیرہ اندوزی کے خلاف کریک ڈاؤن کا اگلا مرحلہ شروع ہونے والا ہے جس کے دوران ذخیرہ شدہ ڈالرزاور غیرملکی کرنسی کی برآمدگی کے لیے ایف آئی اے اور حساس ادارے گھروں پرچھاپے ماریں گے۔
حساس اداروں نے ایکسچینج کمپنیز سے ڈیٹا حاصل کر لیا ہے جس کی مدد سے ملک بھر میں گھروں کی نشاندہی کرلی گئی ہے۔
ذرائع کے مطابق حساس اداروں کو کریک ڈاؤن کے بعد مافیاز کے گھروں میں ڈالر ذخیرہ کرنے کی مستند اطلاعات ملی ہیں، حساس اداروں نے غیر معمولی تعداد میں ڈالرخریدنے والوں کی فہرست بھی حاصل کر لی ہے۔
ذرائع کے مطابق گھروں پرٹارگٹڈ چھاپہ مار کارروائی کی جائے گی اور گھروں میں ڈالر چھپانے والوں کو گرفتار کر کے متعلقہ دفعات کے تحت قانونی کارروائی کی جائے گی۔
حالیہ دنوں میں ڈالر مافیا کے خلاف جاری کریک ڈاؤن کے دوران اب تک ڈالر 30 روپے سستا ہوچکا ہے، یکم ستمبر کو ڈالر 328 روپے کی بلند ترین سطح پر بند ہوا تھا جبکہ اوپن مارکیٹ میں بھی ڈالر کی قدر میں بڑی کمی آئی ہے۔
