اسلام آباد(نئی تازہ رپورٹ) انسداد دہشتگردی کی عدالت نے سابق وزیراعلیٰ اورپی ٹی آئی کے صدر پرویز الٰہی کے جوڈیشل ریمانڈ کی منظوری دی ۔ جبکہ دوسرے مقدمہ میں اینٹی کرپشن پنجاب کی درخواست پر ایک روزہ راہداری ریمانڈ بھی منظور کر لیا۔
پیر کو انسداد دہشتگردی کی عدالت کے جج ابوالحسنات نے پرویز الٰہی کے خلاف جوڈیشل کمپلیکس میں توڑپھوڑکیس کی سماعت کی ، پولیس نے پرویز الٰہی کو عدالت میں پیش کیا۔
سماعت کے موقع پر پرویز الٰہی نے بتایا کہ کل مجھے اسلام آباد سے لاہور لے گئے، میری فیملی سے ملاقات نہیں کروائی، فیملی سے ملاقات کا مناسب آرڈر دے دیں اس پر جج نے کہا کہ جیل والے بھی آپ کی فیملی ہیں۔
عدالت نے پوچھا کہ پرویزالٰہی کی کب جان چھوٹےگی؟ وکیل صفائی نےکہا کہ کبھی کسی شہر اور کبھی کسی شہرچکر لگوا رہے، کون سا مقدمہ ہے؟ تفتیشی افسر نے بتایا کہ جوڈیشل کمپلیکس توڑپھوڑ کا مقدمہ ہے۔
دوران سماعت اینٹی کرپشن پنجاب نے پرویز الٰہی کے راہداری ریمانڈ کی درخواست دائرکی،عدالت نے پرویز الٰہی کا جوڈیشل ریمانڈمنظور کیا اور ان کو ایک روزہ راہداری ریمانڈ پر اینٹی کرپشن حکام کے حوالے کردیا۔
