لاہور( نئی تازہ رپورٹ) پاکستان سپر لیگ 8 کے فائنل میچ کی تاریخ بارش کی پیشگوئی کی وجہ سے تبدیل کردی گئی، ٹرافی کے لئے حتمی مقابلہ اب اتوار کے بجائے ہفتے کے روز ہو گا۔
پاکستان کرکٹ بورڈ کی مینجمنٹ کمیٹی کے چیئرمین نجم سیٹھی نے ٹوئٹر پر ایک بیان میں پی ایس ایل کے فائنل میچ کی تاریخ تبدیل کرنے کا اعلان کیا۔
نجم سیٹھی نے اپنے بیان میں کہا کہ پاکستان سپر لیگ 8 کے فائنل پر بارش کا خطرہ منڈلا رہا ہے اور پی سی بی کے ساتھ ساتھ فرنچائزز بھی فکرمند ہیں کہ فائنل کو بارش کی وجہ سے متاثر نہیں ہونا چاہیے۔
انہوں نے کہا کہ اتوار 19 مارچ کو شیڈول فائنل میچ اب ہفتہ 18مارچ کو کھیلا جائے گا اور پہلے سے خریدے گئے ٹکٹ ہفتے کے روز ہونے والے فائنل میچ میں استعمال ہو سکیں گے۔
رپورٹس کے مطابق اتوار اور پیر کو ریزرو ڈے رکھا گیا ہے۔بارش کے باعث اگر فائنل میچ ہفتے کے روز مکمل نہ ہو سکا تو اسے اتوار اور پیر کے روز مکمل کیا جائے گا۔
پی ایس ایل 8 کے فائنل کے لیے ملتان سلطانز کی ٹیم کوالیفائی کر چکی ہے جبکہ دوسری ٹیم کا فیصلہ ہونا باقی ہے۔
