لاہور( نئی تازہ رپورٹ) پنجاب میں ہیپاٹائٹس کے 29 لاکھ سے زائد مریضوں کی موجودگی کا انکشاف ہوا ہے۔
نجی ٹی وی نے سرکاری دستاویز کے حوالے سے ایک رپورٹ میں بتایا کہ پنجاب بھر میں ہیپاٹائٹس کے مریضوں کی تعداد 29 لاکھ سے زیادہ ہو گئی ہے، جبکہ صوبہ بھر میں قائم 217 کلینکس میں سے صرف 23 میں پی سی آر کی سہولت موجود ہے۔
دستاویزات میں کہا گیا ہے کہ اب تک 9 لاکھ 81 ہزار سے زائد پی سی آر کئے جاچکے ہیں، انتہائی موذی مرض کے 62 فیصد پھیلنے کی ایک بڑی وجہ سرنج کا ایک سے زیادہ مرتبہ استعمال ہے۔
رپورٹ کے مطابق پنجاب میں صرف ہیپاٹائٹس سی کے 76 ہزار سے زائد مریض موجود ہیں، جبکہ حال ہی میں کیے گئے ٹیسٹوں سے ہیپاٹائٹس بی کے ایک لاکھ 38 ہزار مریضوں کی موجودگی کا انکشاف ہوا ۔
دستاویز کے مطابق اس سے قبل صوبہ بھر میں ہیپاٹائٹس بی اور سی کے رجسٹرڈ مریضوں کی تعداد 4 لاکھ تھی۔
