فیصل آباد ( نئی تازہ رپورٹ) جڑانوالہ میں جلاؤ گھیراؤ کے واقعے میں ملوث 150 سے زائد افراد گرفتار کرلیے گئے ۔
تھانہ سٹی جڑانوالہ میں واقعے میں ملوث ایک نامزد اور 1200 سے زائد نامعلوم افراد کے خلاف دو مقدمات درج کیے گئے ہیں ۔
ایف آئی آرز میں دہشت گردی، اقدام قتل، توڑ پھوڑ، پولیس سے مزاحمت، جلاؤ گھیراؤ، سرکاری و غیر سرکاری املاک کو نقصان پہنچانے کی دفعات شامل کی گئی ہیں ۔
ضلع بھر میں دفعہ 144 نافذ ہے اور ہر قسم کے اجتماعات پر پابندی عائد کردی گئی ہے جبکہ تحصیل جڑانوالہ میں آج جمعرات کومقامی سطح پر سرکاری تعطیل کا اعلان کیا گیاتھا۔ تحصیل جڑانوالہ میں سرکاری و غیرسرکاری تمام ادارے اور مارکیٹیں بند رہے ۔ صورتحال کو کنٹرول کرنے کیلئے پولیس، رینجرز، ایلیٹ فورس کی بھاری نفری تعینات کی گئی ہے ۔
واضح رہے کہ پنجاب حکومت نے جڑانوالہ واقعے کی اعلیٰ سطح پر انکوائری کا حکم دیا ہے ۔
میڈیا رپورٹ کے مطابق جڑانوالہ میں توہینِ مذہب کے مبینہ واقعے کیخلاف احتجاج کرنے والے مشتعل افراد نے بدھ کو مسیحی برادری کے درجنوں مکان، گاڑیاں اور مال و اسباب جلا دیے تھے، جبکہ ان کی عبادت گاہوں کو بھی نشانہ بنایا گیا تھا ۔
