لاہور ( نئی تازہ نیوز)چیئرمین پاکستان تحریک انصاف عمران خان نے جیل بھروتحریک کااعلان کرتے ہوئے کہا ہے کہ وقت آگیا ہے کہ ہم تیاری کریں، میں جیل بھرو تحریک کال دوں گا کی، میرے اشارے پر لوگ نکلیں گے اور گرفتاریاں دیں گے۔ ہمیں علم ہے جیلوں کی گنجائش کتنی ہے ،ان کو پتا چل جائے گا قوم کہاں کھڑی ہے۔
ہفتہ کو ویڈیو لنک خطاب میں عمران خان نے کہا کہ ہم آج بحیثیت قوم نہ جاگے تو سب اس صورت حال کے ذمہ دار ہوں گے۔ریاست مدینہ کی بنیاد عدل و انصاف پر رکھی گئی تھی، عدل وانصاف کے بغیر کسی ریاست میں خوشحالی نہیں آسکتی، عدل و انصاف کے معاشرے میں بڑے لوگ چوری کر کے معاف نہیں کروا سکتے، جہاں انصاف ہوتا ہے وہاں قبضہ گروپ اور این آر او نہیں ہوتا۔ عمران خان نے کہا کہ کہ معیشت کی بہتری کیلئے بھی قانون کی حکمرانی ضروری ہے، سرمایہ کار اپنا سرمایہ اسی ریاست میں لگاتے ہیں جہاں قانون کی حکمرانی ہو۔
چیئرمین پی ٹی آئی نے کہا کہ سازش کے تحت ملک میں چوروں کی حکومت لائی گئی، اسحاق ڈار نے بڑیبڑھکیں ماریں کہ ڈالر کو 200 سے نیچے لے کر آؤں گا، جب عدم اعتماد لائی گئی تو ڈالر178روپے کا تھا، 9مہینے میں ڈالر 100روپے مہنگا ہوچکا ہے، ڈالر مہنگا ہونے سے ملک میں مہنگائی آچکی ہے، ملک میں ابھی مزید مہنگائی ہونے والی ہے۔
عمران خان نے کہا کہ حکومت کو یہ معلوم نہیں کہ حالات بہتر کیسے ہوں گے، امپورٹڈ حکومت الیکشن سے بھاگنے کی بھی تیاری کر رہی ہے، یہ اپنے مخالفین کے خلاف کیسز بنارہے ہیں، اگر ہم آج بحیثیت قوم نہ جاگے تو سب اس صورت حال کے ذمہ دار ہوں گے۔چیئرمین پاکستان تحریک انصاف نے کہا کہ ملک میں سیاسی استحکام کے بغیر معاشی استحکام نہیں آ سکتا، امپورٹڈحکومت الیکشن سے خوفزدہ ہے، ہم نے آئین کے تحت ہی اپنی اسمبلیوں کو تحلیل کیا تھا، 18دن گزر گئے مگر دونوں گورنرز نے الیکشن کی تاریخ نہیں دی، اگروقت پر الیکشن نہ ہوئے تو یہ غیرآئینی اقدام ہوگا۔
سابق وزیر اعظم نےخطاب میں کہا کہ حکومت نے مجھے جیل میں ڈالنے کا پلان بنایا ہوا ہے، ا ن کا مقصد اپوزیشن کو سائیڈ لائن کرنا ہے تاکہ ٹیم کا 12واں کھلاڑی لندن سے آئے، ان کے پاس کو ملک ٹھیک کرنے کا کوئی روڈ میپ نہیں، انہیں ملک کی بربادی کی کوئی فکر نہیں کیونکہ ان کے پیسے باہر پڑے ہیں۔ عمران خان نے کہا کہ سارا پاکستان آج عدلیہ کی طرف دیکھ رہا ہے، میں امید رکھتا کہ ہماری عدلیہ آئین کے ساتھ کھڑی ہوگی۔
عمران خان نےسابق وزیراعلیٰ پنجاب اور ق لیگ کے رہنما چوہدری پرویز الٰہی سے ملاقات کے دوران گفتگو کرتے ہوئے کہا کہ حکومت کو امن و امان کی نہیں بلکہ مخالفین کو کچلنے کی فکر ہے۔ حکومت کی انتقامی کارروائیوں کے پیچھے کچھ اور لوگ ہیں۔عمران خان نے کہا کہ حکومت کی ناک تلے دوبارہ دہشت گردی ملک میں سر اُٹھا رہی ہے، حکومت الیکشن سے بھاگ نہیں سکتی۔ حکومت کو انتخابات کی تاریخ دینی ہی پڑے گی ورنہ یہ آئین شکنی کی مرتکب ہوگی۔
