لاہور ( نئی تازہ رپوورٹ) وزیراعظم شہباز شریف اور مسلم لیگ ن کی چیف آرگنائزر مریم نواز نے پارٹی کے ناراض ارکان کو منانے کا فیصلہ کیا ہے۔نجی ٹی وی کے مطابق ماڈل ٹاؤن میں مریم نواز کی وزیراعظم شہباز شریف سے ملاقات ہوئی . ملاقات میں سابق وزیراعظم شاہد خاقان عباسی کے پارٹی عہدے سے مستعفی ہونے کے معاملے پر بھی بات چیت ہوئی، شہباز شریف اور مریم نواز نے شاہد خاقان عباسی کے تحفظات دور کرنے پر اتفاق کیا، وزیراعظم نے مریم نواز کو جلد شاہد خاقان عباسی سے ملاقات کی ہدایت کی ۔اس حوالے سے مریم نواز نے کہا کہ سابق وزیراعظم شاہد خاقان نواز شریف کے دیرینہ ساتھی ہیں۔
ذرائع کے مطابق ملاقات میں پنجاب اور خیبرپختونخوا کے متوقع انتخابات کے معاملے پر بھی تفصیلی گفتگو ہوئی ۔وزیراعظم شہباز شریف نے کہا کہ الیکشن کمیشن کی مقرر کردہ تاریخ پر مسلم لیگ ن بھرپور تیاری کے ساتھ انتخابات میں حصہ لے گی۔ذرائع نے بتایا کہ وزیراعظم شہباز شریف اور مریم نواز کے درمیان ملاقات میں مہنگائی کی لہر بارے بھی گفتگو ہوئی، ملاقات میں عوام کو مہنگائی سے چھٹکارے کیلئے ریلیف دینے پر غور کیا گیا۔
