لاہور (نئی تازہ رپورٹ) شاہدرہ کےدو گروپوں میں تصادم کے نتیجہ میں فائرنگ سے دو بچے جاں بحق جب کہ چار افراد زخمی ہو گئے۔ میڈیا رپورٹ کے مطابق لاہور کے علاقہ شاہدرہ ٹاؤن میں دو گروپوں میں تصادم ہوا،فائرنگ کے نتیجہ میں 2 بچے جاں بحق جب کہ چار افراد زخمی ہو گئے، بتایا گیا ہے کہ فائرنگ سے زخمی ہونے والوں کو طبی امداد کے لیے میو ہسپتال منتقل کیا گیا تاہم6 سالہ مجتبی اور 6 سالہ ارباب زخموں کی تاب نہ لاکردم توڑ گئے۔
واقعہ کی اطلاع ملنے پر پولیس کی بھاری نفری موقع پر پہپنچ گئی، بتا یا گیا کہ فائرنگ وقاص اور شاہجہاں گروپوں کے درمیان ہوئی جب کہ فائرنگ کے بعد ملزمان موقع سے فرار ہوگئے۔پولیس کے مطابق زخمیوں میں منتظر، رضاء، سعید، ضیغم شامل ہیں، ڈی آئی جی آپریشنز افضال احمد کوثر نے واقعہ کا نوٹس لیتے ہوئے ایس پی سٹی سے رپورٹ طلب کرلی۔ افضال احمد کوثر نے افسران کو موقع پر پہنچنے اور واقعہ میں ملوث افراد کے خلاف بلا تفریق کارروائی کا حکم دیا۔ڈی آئی جی آپریشنز نے ملزمان کی جلد از جلد گرفتاری یقینی بنانے کی ہدایت کی ہے۔
