کوئٹہ/لاہور( نئی تازہ ڈیسک) پاکستان میں 1447 ہجری کے محرم الحرام کا چاند نظر آگیا ہے،یکم محرم الحرام بروز جمعہ 27 جون کو ہوگی اور یوم عاشور 6 جولائی بروز اتوار منایا جائے گا۔ یہ اعلان مرکزی رویت ہلال کمیٹی کے چیئرمین مولانا عبدالخبیر آزاد نے کوئٹہ میں ایک اجلاس کے بعد کیا۔ اجلاس میں سپارکو اور محکمہ موسمیات کے حکام بھی موجود تھے، جنہوں نے چاند کی رویت کے حوالے سے اپنی تکنیکی معاونت فراہم کی۔ مولانا عبدالخبیر آزاد کے مطابق، 9 محرم الحرام بروز ہفتہ 5 جولائی کو ہوگی۔
محرم الحرام کے دوران امن و امان کو یقینی بنانے کے لیے پنجاب حکومت نے صوبے بھر میں انتہائی سخت سیکیورٹی انتظامات کیے ہیں۔ صوبائی وزیر اطلاعات عظمیٰ بخاری نے میڈیا سے گفتگو کرتے ہوئے بتایا کہ وزیر اعلیٰ پنجاب کی ہدایت پر تمام ضروری اقدامات مکمل کر لیے گئے ہیں۔ ان اقدامات میں رینجرز اور فوج کی تعیناتی بھی شامل ہے، جو محرم الحرام کے دوران سیکیورٹی میں معاونت کریں گے۔ سیکیورٹی اداروں نے پہلے ہی کچھ “سلیپنگ سیلز” کو حراست میں لیا ہے اور دیگر خطرات پر بھی مسلسل نظر رکھی جا رہی ہے۔
عظمیٰ بخاری نے مزید بتایا کہ موبائل فون سروس کی بندش اور ڈبل سواری پر پابندی کا فیصلہ حالات کے مطابق وقت آنے پر کیا جائے گا۔ اس سال محرم کے دوران پنجاب بھر میں تقریباً 38 ہزار مجالس اور 9 ہزار سے زائد جلوسوں کا انعقاد متوقع ہے۔ ان تقریبات کی سیکیورٹی کے لیے 2 لاکھ 38 ہزار سے زائد پولیس افسران و اہلکار، جبکہ 35 ہزار سے زائد رضاکار تعینات کیے جائیں گے۔ ڈولفن فورس اور سی ٹی ڈی سمیت دیگر ادارے بھی متحرک رہیں گے۔
حکومت نے ایک ضابطہ اخلاق بھی جاری کیا ہے جس پر سختی سے عمل درآمد کرایا جائے گا۔ سوشل میڈیا پر نفرت انگیز مواد کی صورت میں فوری کارروائی کی جائے گی اور سائبر سیکیورٹی فورس اس حوالے سے متحرک رہے گی۔ جلوسوں کی کوریج یا کسی بھی مقصد کے لیے ڈرون کے استعمال پر مکمل پابندی ہو گی اور اینٹی ڈرون سسٹم استعمال کیا جائے گا۔ تمام بڑے شہروں میں کنٹرول رومز قائم کر دیے گئے ہیں جو اپنی سرگرمیاں شروع کر چکے ہیں۔
وال چاکنگ اور نفرت انگیز بینرز کی مکمل ممانعت ہو گی۔ پنجاب کے 18 شہروں میں سیف سٹی کیمروں سے جلوسوں کی نگرانی کی جائے گی اور جلوسوں کے روٹس پر اضافی کیمرے نصب کیے جا رہے ہیں۔ تمام اضلاع کی انتظامیہ آج اپنی فرضی سیکیورٹی مشقیں مکمل کرے گی۔ عزمی بخاری نے مزید بتایا کہ عزاداروں کے لیے ٹھنڈے پانی اور مشروبات کے کیمپ وزیر اعلیٰ کی ہدایت پر لگائے جائیں گے۔ یہ سبیلیں رجسٹرڈ ہوں گی اور ان کے معیار کی نگرانی فوڈ ڈیپارٹمنٹ کرے گا۔
