کراچی ( نئی تازہ نیوز) کراچی سے جدہ جانے والی سعودی ایئر کی پرواز نے ٹیک آف کے چند منٹ بعد ہی کراچی ایئرپورٹ پر ہنگامی لینڈنگ کی۔ ذرائع کے مطابق، پائلٹ کو پرواز کے دوران انجن میں آگ کی وارننگ موصول ہوئی، جس کے بعد ایئر ٹریفک کنٹرول سے رابطہ کر کے ہنگامی لینڈنگ کی اجازت لی گئی۔
ایئر ٹریفک کنٹرول نے فوری طور پر رن وے 25 ایل کو خالی کروا کر پرواز کو بحفاظت اتار لیا۔ طیارے میں 200 سے زائد مسافر سوار تھے، جو تمام محفوظ رہے۔ طیارے کی تکنیکی جانچ کے لیے انجینئرنگ ٹیم کو طلب کر لیا گیا جبکہ سول ایوی ایشن کو بھی صورتحال سے آگاہ کر دیا گیا ہے۔
دوسری جانب اس سے قبل سعودی ایئر کی قاہرہ سے لندن جانے والی ایک پرواز نے بھی قاہرہ انٹرنیشنل ایئرپورٹ پر ہنگامی لینڈنگ کی۔ رپورٹ کے مطابق دورانِ پرواز کیبن منیجر محسن بن سعید الزہرانی کو دل کا دورہ پڑا جو جان لیوا ثابت ہوا۔ پائلٹ نے فوری طور پر کنٹرول ٹاور سے رابطہ کر کے قاہرہ میں ہنگامی لینڈنگ کی، جہاں طبی عملے نے کیبن منیجر کے انتقال کی تصدیق کر دی۔
