راولپنڈی ( نئی تازہ رپورٹ) مال روڈ پر طویل عرصے سے زیر تعمیر جی پی او چوک انڈر پاس پیر 30 جون کو باقاعدہ طور پر ٹریفک کے لیے کھول دیا جائے گا۔ 4.6 ارب روپے کی لاگت سے چار ماہ کی مدت میں مکمل ہونے والا یہ منصوبہ شہر کی 26 کلومیٹر طویل مال روڈ کو سگنل فری بنانے اور ٹریفک کے بہاؤ میں نمایاں بہتری لانےمیں مدد دے گا۔
1.93 کلومیٹر طویل یہ انڈر پاس شہر میں ٹریفک کے دیرینہ مسئلے بالخصوص وی آئی پی موومنٹس کے دوران ہونے والی شدید بھیڑ کو کم کرنے کے لیے ناگزیر قرار دیا جا رہا تھا۔ اس جدید ترین انفراسٹرکچر میں 2,025 پائلز، 50 گرڈرز، اور ایک مکمل پل شامل ہے، جس کے ساتھ ساتھ دونوں اطراف 20 فٹ چوڑی سروس روڈز اور پیدل چلنے والوں کے لیے فٹ پاتھ بھی بنائے گئے ہیں۔
اس منصوبے کو شہر کی ایک بڑی اور جدید ترین اپ گریڈیشن قرار دیا جا رہا ہے۔ آپریشنل ہونے کے بعد یہ انڈر پاس صدر سے کچہری تک سگنل فری سفر کو یقینی بنائے گا، جس سے ٹریفک کے بہائومیں بہتری آئے گی۔
ذرائع کے مطابق مرکزی تعمیراتی کام مکمل ہو چکا ہے، جبکہ پینٹنگ اور کمپیوٹرائزڈ ڈیجیٹل ایڈورٹائزنگ بورڈز کی تنصیب سمیت دیگر امور کو حتمی شکل دی جارہی ہے۔ شہر کو خوبصورت بنانے کے وسیع تر منصوبے کے تحت، اس علاقے میں خوبصورت گھاس، پھول، اور 20,000 سے زائد درخت لگائے جائیں گے جن میں پھل دار اور سایہ دار اقسام شامل ہیں۔ عوامی تحفظ کو یقینی بنانے کے لیے انڈر پاس کی سی سی ٹی وی نگرانی بھی کی جائے گی۔
