اسلام آباد ( نئی تازہ رپورٹ) حکومت نے پیٹرول اور ڈیزل کی قیمتوں میں بڑا اضافہ کر دیا ہے۔ نئی قیمتوں کا اطلاق آج 16 جون سے ہوگیا ہے، جو 30 جون 2025 تک برقرار رہے گا۔
وزارت خزانہ کی جانب سے جاری نوٹیفکیشن کے مطابق پیٹرول کی قیمت میں 4 روپے 80 پیسے فی لیٹر اضافہ کیا گیا ہے، جس کے بعد نئی قیمت 258 روپے 45 پیسے فی لیٹر ہو گئی ہے۔ اسی طرح ہائی اسپیڈ ڈیزل کی قیمت 7 روپے 95 پیسے فی لیٹر بڑھائی گئی ہے، جس کے بعد اس کی نئی قیمت 262 روپے 59 پیسے مقرر کی گئی ہے۔
نوٹیفکیشن میں بتایا گیا ہے کہ قیمتوں میں اضافے کا اطلاق اتوار اور پیر کی درمیانی شب 12 بجے سے ہو گا۔
واضح رہے کہ حالیہ دنوں میں اسرائیل اور ایران کے درمیان کشیدگی کے باعث عالمی منڈی میں خام تیل کی قیمتوں میں اضافہ دیکھا گیا، جس کا اثر مقامی قیمتوں پر بھی پڑا ہے۔
