اسلام آباد ( نئی تازہ رپورٹ) چیف جسٹس عمر عطاء بندیال کے بینچ کے سامنے آج بدھ کو سماعت کے لئے مقرر تمام 12 کیسز ڈی لسٹ کر دیے گئے۔
رجسٹرار سپریم کورٹ نے بینچ اورکیسز ڈی لسٹ ہونے کا نوٹیفکیشن جاری کر دیا ہے۔چیف جسٹس کی سربراہی میں تین رکنی بینچ میں جسٹس جمال مندوخیل اور جسٹس اطہر من اللہ ہ بھی شامل تھے۔بینچ کے سامنے 12 کیسز سماعت کے لیے مقرر تھے۔
دریں اثنا سپریم کورٹ کے بینچ نمبر 2 کے مقدمات کی فہرست بھی منسوخ کر دی گئی ہے۔جسٹس سردار طارق مسعود اور جسٹس شاہد وحید پر مشتمل اس بینچ کی کاز لسٹ منسوخ کرنے کا نوٹیفکیشن بھی جاری کیا گیا ہے۔بینچ نمبر 2 کے سامنے سماعت کے لیے مقرر کیسز کے لئے نیا بینچ تشکیل دے دیا گیا۔جسٹس اعجاز الاحسن اور جسٹس امین الدین خان پر مشتمل نیا بینچ اب بینچ نمبر 2 کے کیسز کی سماعت کرے گا۔
چیف جسٹس عمر عطا بندیال کے بینچ کے ڈی لسٹ ہونے سے متعلق نجی ٹی وی نے ذرائع کے حوالے سےبتایا کہ بینچ چیف جسٹس کی خرابیٔ صحت کی وجہ سے ڈی لسٹ ہوا۔
ذرائع کے مطابق چیف جسٹس پاکستان عمر عطاء بندیال گزشتہ روز اپنے گاؤں میں تھے ، وہ بخار، جسم درد اور فلو کا شکار ہیں۔
