لاہور ( نئی تازہ رپورٹ) وزیراعلیٰ پنجاب مریم نواز نے کہا ہے کہ پنجاب میں صنعتی اور مائنز ورکرز کے بچے اب ملک کے بہترین تعلیمی اداروں میں مفت تعلیم حاصل کریں گے۔ پنجاب میں اب کوئی بچہ، چاہے وہ مزدور کا ہو، تعلیم سے محروم نہیں رہے گا۔
انہوں نے کہا کہ کامسٹ یونیورسٹی کے سات کیمپسز میں ورکرز کے بچوں کو داخلہ دیا جائے گا، اور ان کی فیس حکومت پنجاب ادا کرے گی۔ مریم نواز کی ہدایت پر پنجاب ورکرز ویلفیئر فنڈ نے درخواستیں طلب کر لی ہیں۔ کامسٹ یونیورسٹی کے اسلام آباد، ایبٹ آباد، واہ کینٹ، اٹک، لاہور، ساہیوال اور وہاڑی کیمپسز میں طلبا داخلہ لے سکیں گے۔ اس سہولت سے معذور یا فوت شدہ ورکرز کے بچے بھی مستفید ہوں گے۔
رجسٹرڈ ورکرز کے لیے درخواستیں جمع کروانے کی آخری تاریخیں درج ذیل ہیں:
اسلام آباد کیمپس 9 جولائی،
لاہور کیمپس 17 جولائی،
واہ کینٹ اور ایبٹ آباد 4 اگست،
وہاڑی اور اٹک 11 اگست،
ساہیوال کیمپس 15 اگست
درخواست کے ساتھ قومی شناختی کارڈ، رجسٹریشن سرٹیفکیٹ، طالب علم کا شناختی کارڈ یا ب فارم، سوشل سیکیورٹی یا اولڈ ایج بینیفٹ کارڈ کی کاپی منسلک کرنا لازم ہوگا۔ امیدوار COMSATS یونیورسٹی کی ویب سائٹ پر آن لائن درخواست دے کر متعلقہ دستاویزات جمع کرا سکتے ہیں۔
مریم نواز نے کہا کہ ورکر ہمارے سر کا تاج ہیں۔ ہم انہیں تعلیم، صحت اور دیگر بنیادی سہولیات فراہم کریں گے۔ پنجاب کے ہر ورکر کے بچے کے لیے اعلیٰ تعلیم کے دروازے کھولے جا رہے ہیں۔
انہوں نے مزید کہا کہ ہم مزدوروں کی فلاح کے لیے ایسے تاریخی اقدامات کر رہے ہیں جن کی ماضی میں کوئی مثال نہیں۔
