لاہور ( نئی تازہ رپورٹ) پنجاب کا مالی سال 2025-26 کا 53 کھرب سے زائد کا بجٹ آج پیر 16 جون کوپیش کیا جائے گا۔ پنجاب اسمبلی کا بجٹ اجلاس سہ پہر 3 بجے منعقد ہوگا، جس میں وزیر خزانہ پنجاب مجتبیٰ شجاع الرحمان بجٹ پیش کریں گے۔ اس سے قبل پنجاب کابینہ کے خصوصی اجلاس میں بجٹ کی منظوری لی جائے گی۔
میڈیا رپورٹ کے مطابق غیر ترقیاتی بجٹ کے لیے 4 ہزار 60 ارب روپے مختص کرنے کی تجویز ہے، جبکہ ترقیاتی پروگرام کے لیے 1240 ارب روپے رکھے جائیں گے۔ پنجاب حکومت نے نئے بجٹ میں 3 ہزار 132 ترقیاتی اسکیمیں شامل کرنے کا فیصلہ کیا ہے۔ جاری اسکیموں کے لیے 535 ارب 98 کروڑ روپے مختص کرنے کی تجویز ہے۔
نئی ترقیاتی اسکیموں کے لیے 470 ارب 62 کروڑ روپے رکھنے کی تجویز ہے۔ پنجاب ایئر لائن کے قیام کے لیے 1 ارب روپے مختص کرنے کا فیصلہ کیا گیا ہے۔ وزیراعلیٰ مریم نواز نے خود مختار پروگرام شروع کرنے کا اعلان کیا ہے، اور پنجاب حکومت نے الیکٹرک پاور ریگولیٹری اتھارٹی کے قیام کا بھی فیصلہ کیا ہے۔
