لاہور: وزیرِ اعلیٰ پنجاب مریم نواز شریف کی زیر صدارت ایک خصوصی اجلاس میں محکمہ لوکل گورنمنٹ اینڈ کمیونٹی ڈویلپمنٹ کے تحت صوبے بھر میں شروع کیے جانے والے ترقیاتی منصوبوں پر تفصیلی بریفنگ دی گئی۔ اجلاس میں پنجاب کے بڑے شہروں اور دیہات میں تعمیر و مرمت اور بحالی کے منصوبوں کی مرحلہ وار اصولی منظوری دی گئی۔
پہلے مرحلے میں پنجاب کے 59 بڑے شہروں میں جدید سیوریج اور ڈرینج انفراسٹرکچر کی تعمیر کی جائے گی، جب کہ بارش کے پانی کے فوری نکاس کے لیے رین واٹر سٹوریج ٹینک بھی قائم کیے جائیں گے۔ واٹر سپلائی کے ٹیوب ویلز کو بجلی کے بھاری بلوں سے بچانے کے لیے سولر انرجی پر منتقل کیا جائے گا۔ شہری علاقوں میں گلیوں کی تعمیر و مرمت اور ٹف ٹائلز کی تنصیب کے منصوبے بھی شامل ہیں۔ ان شہروں میں پارکوں کی تعمیر کا بھی آغاز ہوگا، جہاں وزیر اعلیٰ کی ہدایت پر بچوں کے لیے جھولے اور دیگر کھیلوں کی سہولیات فراہم کی جائیں گی۔
وزیرِ اعلیٰ نے دیہی علاقوں میں بھی یکساں ترقی کو یقینی بنانے کی ہدایت کی۔ دیہات میں ڈرینج سسٹم کی تعمیر و بحالی، گلیوں میں ٹف ٹائلز کی تنصیب، ہر گاؤں کے مرکزی قبرستان کی چار دیواری اور صفائی کے خصوصی انتظامات کیے جائیں گے۔ علاوہ ازیں دیہات میں نئے پارک، پلے گراؤنڈز، سائن بورڈز کی تنصیب اور گھروں کی نمبرنگ بھی کی جائے گی۔
وزیرِ اعلیٰ کی ہدایت پر دیہات میں جوہڑوں کی صفائی کے لیے بائیوٹیکنالوجی پر مبنی ایک منفرد منصوبہ بھی شروع کیا جا رہا ہے، جس کے تحت گندے پانی کے جوہڑوں میں ایسے مخصوص پودے لگائے جائیں گے جو بدبو اور گندگی کو جذب کرنے کی قدرتی صلاحیت رکھتے ہیں، اور اس طرح ماحولیاتی آلودگی میں کمی ممکن ہوگی۔
اجلاس میں رورل روڈ بحالی پروگرام کا بھی جائزہ لیا گیا، جس کے تحت دیہات کی 4500 کلومیٹر سڑکوں کی تعمیر و بحالی پر اتفاق کیا گیا۔ اس کے علاوہ، ہر یونین کونسل میں عوام کی سہولت کے لیے میٹنگ ہال، کونسل روم اور سیکرٹری آفس کی تعمیر کے منصوبے پر بھی بریفنگ دی گئی۔
اجلاس کے اختتام پر وزیرِ اعلیٰ مریم نواز شریف نے کہا کہ صوبے میں تاریخ کا سب سے بڑا صفائی پروگرام “ستھرا پنجاب” کامیابی سے جاری ہے، اور شہریوں سے اپیل کی کہ وہ بھی اس مہم میں بھرپور حصہ ڈالیں۔
