اسلام آباد( نئی تازہ مانیٹرنگ) الیکشن کمیشن آف پاکستان نے سرگودھا میں قومی اسمبلی کے دو حلقوں کا الیکشن ملتوی کرنے کے ریٹرننگ افسران کے نوٹیفکیشن منسوخ کر دیے۔
چیف الیکشن کمشنر نے درخواست کی سماعت کے بعد فیصلہ کیا کہ دونوں حلقوں این اے 83 اور این اے 85 میں انتخابات شیڈول کے مطابق ہوں گے ، انہوں نے ہدایت کی کہ انتخابی عمل جاری رکھا جائے۔
این اے 83 اور این اے 85 سرگودھا میں امیدوار فوت ہونے پر انتخابات ملتوی کرنے کے خلاف الیکشن کمیشن میں درخواست کی سماعت ہوئی۔
درخواست گزار ،مسلم لیگ ن کے امیدوار ذوالفقار علی بھٹی نے الیکشن کمیشن میں پیش ہوکر بتایا کہ وفات پانے والے امیدوار کا ڈیتھ سرٹیفیکیٹ 15 جنوری کا بنایا گیا ہے، جبکہ تحقیقات کرنے پر معلوم ہوا کہ صادق علی کی وفات 2 جنوری کوہوئی تھی جس کی 3 جنوری کو نماز جنازہ ہوئی، اس معاملہ میں جعل سازی کی گئی ہے۔
ڈی آر او سرگودھا نے بتایا کہ انکوائری میں ثابت ہو گیا ہے کہ صادق علی کی وفات 2 جنوری کو ہوئی ہے۔ریٹرننگ افسر این اے 85 نےکہا کہ ہمیں جعلی ڈیتھ سرٹیفکیٹ فراہم کیا گیا تھا۔
چیف الیکشن کمشنر نے ڈی سی سرگودھا کو سیکرٹری یونین کونسل کے خلاف کارروائی کی ہدایت کرتے ہوئے انتخابات ملتوی کرنے کے ریٹرننگ افسران کے نوٹیفکیشن منسوخ کر دیے۔ دونوں حلقوں میں انتخابات شیڈول کے مطابق ہوں گے۔
