لاہور ( نئی تازہ رپورٹ) نگران وزیر اعلیٰ پنجاب محسن نقوی کو پاکستان کرکٹ بورڈ کے بورڈ آف گورنرز میں نامزد کرنے کا فیصلہ کرلیا گیا۔محسن نقوی بورڈ آف گورنرز میں مستعفی ہونے والے چیئرمین پی سی بی مینجمنٹ کمیٹی ذکا اشرف کی جگہ لے سکتے ہیں۔
پی سی بی مینجمنٹ کمیٹی کے سربراہ ذکا اشرف نے 19 جنوری کوعہدے سے استعفیٰ دے دیا تھا۔
واضح رہے کہ محسن نقوی اس وقت پنجاب کے نگران وزیر اعلیٰ ہیں جنہیں بورڈ آف گورنرز میں شامل کرنے کا فیصلہ کیا ہے۔
نجی ٹی وی کے مطابق بورڈ آف گورنرز میں وزیر اعظم کی طرف سے دو افراد کو نامزدکیا جاتا ہے، جن میں سے ایک مصطفیٰ رمدے ہیں اور دوسرا نام محسن نقوی کا شامل کرنے کا فیصلہ کیا گیا ہے۔بعد ازاں پاکستان کرکٹ بورڈ کے انتخابات میں بورڈ آف گورنرز میں سے ہی چیئرمین کا انتخاب کیا جاتا ہے۔
صحافی نے محسن نقوی سے سوال کیا کہ آپ کو چیئرمین پی سی بی لگایا جا رہا ہے؟ جس پر انہوں نے مسکراتے ہوئے جواب دیا کہ کیا واقعی مجھے چیئرمین پی سی بی لگایا جا رہا ہے۔
نجی ٹی وی کے مطابق محسن نقوی نے اس حوالے سے صحافی کے سوال پر اثبات میں سر ہلا کر تصدیق کی اور کہا کہ کوشش کروں گا کرکٹ کے معاملات کو بھی تیزی سے حل کروں، انہوں نے کہا کہ کرکٹ میں اصلاحات بہت ضروری ہیں، ملک کی خدمت کے لیے جو رول ملا اسے پورا کروں گا،انہوں نے کہا کہ اپنی کابینہ میں بھی ایک کرکٹر کو وزیر بنایا۔
