اسلام آباد ( نئی تازہ رپورٹ) سپریم کورٹ نے فیض آباد دھرنا کیس کے فیصلے کے خلاف نظر ثانی کی درخواستیں سماعت کے لیے مقرر کردی ہیں۔
پاکستان تحریک انصاف ، وزارت دفاع، عوامی مسلم لیگ کے سربراہ شیخ رشید اور دیگرنے فیصلہ کے خلاف نظر ثانی کی درخواستیں دائر کر رکھی ہیں۔
سپریم کورٹ کی طرف سے جاری کاز لسٹ کے مطابق فیض آباد دھرنا کیس کے فیصلے کے خلاف نظرثانی کی درخواستوں پر چیف جسٹس قاضی فائز عیسیٰ کی سربراہی میں جسٹس امین الدین خان اور جسٹس اطہر من اللہ پر مشتمل تین رکنی بینچ 28 ستمبر کو سماعت کرے گا۔
یاد رہے کہ سپریم کورٹ نے نومبر 2018 میں فیض آباد دھرنے سے متعلق ازخود نوٹس لیا تھا اور جسٹس قاضی فائز عیسیٰ اور جسٹس مشیر عالم پر مشتمل دو رکنی بینچ نے فروری 2019 میں تفصیلی فیصلہ سنایا تھا۔
فیصلے کے خلاف اپریل 2019 میں اس وقت کی وفاقی حکومت نے وزارت دفاع توسط سے انٹیلی جینس بیورو (آئی بی)، انٹروسز انٹیلیجنس (آئی ایس آئی)، پاکستان الیکٹرا نک میڈیا ریگیولیٹری اتھارٹی (پیمرا)، الیکشن کمیشن ، پی ٹی آئی، متحدہ قومی موومنٹ پاکستان، عوامی مسلم لیگ کے سربراہ شیخ رشید احمد اور اعجاز الحق کی جانب سے فیصلے پر نظرثانی کے لیے درخواست دائر کی تھی۔
