راولپنڈی( نئی تازہ رپورٹ) احتساب عدالت نے سپریم کورٹ کے فیصلہ کے بعد 22 ریفرنسز بحال کردیے، سماعت پیر کو ہوگی۔
میڈیا رپورٹ کے مطابق سپریم کورٹ کی طرف سے نیب ترامیم کالعدم قرار دیے جانے کے بعد فیصلے پر عمل درآمد کے تحت احتساب عدالت راولپنڈی نے 22 نیب ریفرنسز بحال کردیے ہیں۔ عدالت نے ریفرنسز کے ملزمان کو نوٹس جاری کرکے 25 ستمبر کو طلب کرلیا ہے۔
دوران سماعت نیب پراسیکیوٹر نے کہا کہ جیل سے کیس ختم کرانے والے ملزمان دوبارہ اڈیالہ جیل بھیجے جائیں گے۔ 8 کیسز کے ملزمان پر فرد جرم عائد کی جائے گی ۔ تمام مضاربہ، جعلی ہاؤسنگ ریفرنس اور کرپشن کیسز بحال ہوگئے۔
احتساب عدالت کے جج راجا قمر زمان نے ریفرنسز ری اوپن کرنے کی درخواست منظور کر لی۔ تمام 22 ریفرنسز کے ملزمان کو طلبی نوٹس متعلقہ تھانوں میں بھجوائے جارہے ہیں۔ عدالت نے حکم دیا کہ طلبی نوٹسز کی آج ہی ملزمان سے تعمیل بھی کروا لی جائے۔
عدالت نے پیر 25 ستمبر کو ری اوپن ہونے والے 22 ریفرنسز کی سماعت کے موقع پر پولیس کی اضافی نفری طلب کی ہے۔
