راولپنڈی ( نئی تازہ رپورٹ) اسلام آباد یونائیٹڈ نے پی ایس ایل 8 کے سنسنی خیز مقابلے میں ملتان سلطانز کو 2 وکٹوں سے شکست دےد ی۔
راولپنڈی کرکٹ اسٹیڈیم میں کھیلے گئے پاکستان سپر لیگ کے آٹھویں ایڈیشن کے 24 ویں میچ میں اسلام آباد یونائیٹڈ 206 رنز کا ہدف ایک گیند قبل حاصل کرنے میں کامیاب رہی۔
اسلام آباد یونائیٹڈ کی جانب سے فہیم اشرف نے عمدہ بلے بازی کرتے ہوئے 26 گیندوں پر 2 چھکوں اور 4 چوکوں کی مدد سے بغیر آئوٹ ہوئے 51 رنز بنا ئے ۔کپتان شاداب خان نے44، کولن منرو 40، رحمان اللہ گرباز 25 اور محمد وسیم نے16 رنز بنا ئے۔
ملتان سلطانز کی جانب سے انور علی نےتین ، احسان اللہ اوراسامہ میر نے دو، دووکٹیں حاصل کیں جبکہ عباس آفریدی نے ایک کھلاڑی کو آئوٹ کیا۔
اس سے قبل اسلام آباد یونائیٹڈ نے ٹاس جیت کر ملتان سلطانز کو بیٹنگ کی دعوت دی. میچ میں پہلے بیٹنگ کرتے ہوئے ملتان سلطانز نے مقررہ 20 اوورز میں 5 وکٹوں کے نقصان پر 205 رنز اسکور کیے۔
ملتان سلطانز کے شان مسعود نے 50 گیندوں پر 75 رنز بنا ئے، تاہم ٹِم ڈیوڈ نے27 گیندوں پر تیز رفتار 60 رنز بنا ئے اور تماشائیوں سے دادسمیٹی۔ کپتان محمد رضوان 33، رائلی روسو 15 اور ڈیوڈ ملر 11 رنز بنا کر آؤٹ ہوئے۔
اسلام آباد یونائیٹڈ کی جانب سے کپتان شاداب خان اور محمد وسیم نے دو، دو جبکہ فہیم اشرف نے ایک کھلاڑی کو آئوٹ کیا۔
