لاہور ( نئی تازہ ڈیسک) پاکستان کرکٹ بورڈ نے ویسٹ انڈیز کرکٹ ٹیم کے دورہ پاکستان کا شیڈول جاری کر دیا ہے، جس کے مطابق ویسٹ انڈیز کی ٹیم 6 جنوری 2025ء کو پاکستان پہنچے گی۔
ویسٹ انڈیز کی کرکٹ ٹیم 6 جنوری کو اسلام آباد پہنچے گی اور 10 سے 12 جنوری تک راولپنڈی کرکٹ اسٹیڈیم میں پاکستان شاہینز کے خلاف تین روزہ میچ کھیلنے کے بعد ملتان میں پاکستان کے خلاف دومیچز کی تیسٹ سیریز کھیلے گی۔
پی سی بی کے مطابق پہلا ٹیسٹ 17 سے 21 جنوری 2025 تک کھیلا جائے گا، جبکہ دوسرا ٹیسٹ بھی 25 سے 29 جنوری 2025 تک ملتان میں ہوگا۔ یہ ویسٹ انڈیز کا تیسٹ سیریز کے لیے 19 سال میں پاکستان کا پہلا دورہ ہوگا۔
ویسٹ انڈیزکی ٹیم نے آخری بار نومبر 2006 میں پاکستان میں تین ٹیسٹ کھیلے تھے، جبکہ پاکستان کے خلاف آخری ٹیسٹ سیریز اکتوبر 2016 میں متحدہ عرب امارات میں ہوئی تھی۔ تاہم ویسٹ انڈیز نے اپریل 2018 کے بعد سے تین بار پاکستان کا دورہ کیا ہے۔ ویسٹ انڈیز ایک بار جون 2022 میں ون ڈے انٹرنیشنل سیریز، اور دو بار ٹی ٹوئنٹی انٹرنیشنل سیریز اپریل 2018 اور دسمبر 2021 میں پاکستان میں کھیل چکی ہے۔
