لاہور( نئی تازہ رپورٹ) مسلم لیگ ن کے قائد نوازشریف کی اتحادی حکومت بنانے کی دعوت پر ایم کیوایم پاکستان کا وفد لاہور پہنچ گیا۔
میڈیا رپورٹ کے مطابق ایم کیو ایم کے وفد میں گورنرسندھ کامران ٹیسوری، خالد مقبول صدیقی ،مصطفیٰ کمال اور فاروق ستار شامل ہیں، مسلم لیگ ن اور ایم کیو ایم پاکستان کی قیادت کے درمیان ملاقات میں حکومت سازی کے لیے سیاسی حکمت عملی پر مشاورت کی جائے گی۔
سابق وزیراعظم مسلم لیگ ن کے قائد نواز شریف نے دیگر سیاسی جماعتوں اور آزاد امیدواروں کو ساتھ بیٹھنے کی دعوت دی تھی۔
نواز شریف نے 9 فروری کو اپنی تقریر میں کہا تھا کہ شہباز شریف کو آصف زرداری، مولانا فضل الرحمان اور خالد مقبول صدیقی سے ملاقات کا ٹاسک دیا ہے۔
اس سے قبل ایم کیو ایم رہنمائوں کی طرف سے یہ بیان سامنے آیا تھا کہ وہ فی الحال مصروف ہیں تاہم بعد ازاں پارٹی قائدین لاہور روانہ ہوگئے۔
