راولپنڈی ( نئی تازہ رپورٹ) پاک فوج کے سربراہ جنرل سید عاصم منیر نے 8 فروری 2024 کو ملک میں عام انتخابات کے کامیاب انعقاد پر قوم، نگران حکومت، الیکشن کمیشن، سیاسی جماعتوں اورکامیاب ہونے والے امیدواروں کو مبارکباد دی ہے اور کہا ہے کہ تمام جمہوری قوتوں کی نمائندہ حکومت ملک کی متنوع سیاست کو قومی مقصد کے ساتھ بہتر طریقے سے پیش کرے گی۔
آئی ایس پی آر سے جاری بیان میں چیف آف آرمی سٹاف نے کہا کہ اپنے حق رائے دہی کے استعمال کے لیےپاکستانی عوام کی آزادانہ اور بلا روک ٹوک شرکت جمہوریت کے لیے ان کے عزم کا ثبوت ہے۔
آرمی چیف نے کہا کہ قانون نافذ کرنے والے اداروں کی قیادت اور اہلکار بے تحاشا مشکلات کے باوجود انتخابی عمل کے لیے محفوظ ماحول بنانے پر تعریف کے مستحق ہیں۔
جنرل عاصم منیر نے کہا کہ قومی میڈیا، سول سوسائٹی، سول انتظامیہ کے تعمیری کردار نے انتخابات کا کامیاب انعقاد ممکن بنایا، انہوں نے کہا کہ عدلیہ کے تعمیری کردار نےانتخابی مشق کے کامیاب انعقاد کو ممکن بنایا۔
سربراہ پاک فوج نے کہا کہ انتخابات، جیتنے ہارنے کا مقابلہ نہیں بلکہ عوام کے مینڈیٹ کا تعین کرنے کی مشق ہے، سیاسی قیادت اورکارکنوں کو ذاتی مفادات سے بالاترہو کراپنی کوششوں کو حکمرانی اور
عوام کی خدمت کرنے کے لیے ہم آہنگ کرنا چاہیے، یہ جمہوریت کو فعال اور بامقصد بنانے کا واحد راستہ ہے۔
آرمی چیف نے کہا کہ پاکستان کے عوام نے آئینِ پاکستان پر اپنا مشترکہ اعتماد ظاہر کیا ہے، اب تمام سیاسی جماعتوں پر فرض ہے کہ وہ سیاسی پختگی اور اتحاد کے ساتھ اس کا جواب دیں۔
جنرل عاصم منیر نے کہا کہ تمام جمہوری قوتوں کی نمائندہ حکومت ملک کی متنوع سیاست کو قومی مقصد کے ساتھ بہتر طریقے سے پیش کرے گی، انتخابات اور جمہوریت پاکستان کے عوام کی خدمت کا ذریعہ ہیں۔
انہوں نے کہا کہ قوم کو انتشار کی سیاست سے آگے بڑھنے کے لیے مستحکم ہاتھوں اور ایک شفا بخش رابطے کی ضرورت ہے، پولرائزیشن اور انتشار 25 کروڑ آبادی والے ترقی پسند ملک کے لیے موزوں نہیں ہے۔
چیف آف آرمی اسٹاف جنرل عاصم منیر نے کہا کہ اِس قومی سنگ میل سے آگے بڑھتے ہوئے ہمیں اس بات پر غور کرنا چاہیے کہ آج ملک کہاں کھڑا ہے، اقوام میں ہمارا صحیح مقام کہاں ہونا چاہیے۔
آرمی چیف نے اس خواہش کا اظہار کیا کہ یہ الیکشن سیاسی اور معاشی استحکام لائیں اور ہمارے پیارے پاکستان کے لیے امن اور خوشحالی کے پیشوا ثابت ہوں۔
