ماریشس کے سابق وزیراعظم پراوِند جگناتھ کومنی لانڈرنگ کے الزام میں گرفتار کر لیا گیا ہے۔ متعدد مقامات پر چھاپوں کے دوران 24 لاکھ ڈالرز کی رقم برآمد کر لی گئی۔
غیر ملکی میڈیا کی رپورٹ کے مطابق پراوِند جگناتھ پر منی لانڈرنگ کے الزامات عائد کیے گئے ہیں، جس کے تحت انہیں حراست میں لیا گیا۔ ماریشس کے سرکاری مالیاتی جرائم کی تحقیقات کرنے والے کمیشن ایف سی سی نے پراوِند جگناتھ کی گرفتاری کی تصدیق کی ہے۔ ایف سی سی کے ترجمان نے کہا کہ سابق وزیراعظم زیر حراست ہیں اور انہیں وسطی ماریشس کے ایک حراستی مرکز میں رکھا جائے گا۔
کمیشن کے مطابق پراوِند جگناتھ کو اس وقت گرفتار کیا گیا جب ایف سی سی کے حکام نے ان کی رہائشگاہ سمیت متعدد مقامات پر چھاپے مارکر 24 لاکھ ڈالرز کی رقم برآمد کی۔ پراوِند جگناتھ کے وکیل نے بتایا کہ انہیں منی لانڈرنگ کے ایک کیس میں گرفتار کیا گیا ہے، تاہم انہوں نے ان الزامات کو مسترد کیا ہے۔
پراوِند جگناتھ ماریشس کی سابق حکومت کے دوسرے اعلیٰ ترین عہدیدار ہیں جنہیں نئی حکومت کی جانب سے حراست میں لیا گیا ہے۔ اس سے قبل، بینک آف ماریشس کے گورنر ہارویش سیگولام کو جنوری 2025 میں گرفتار کیا گیا تھا، تاہم بعد ازاں ضمانت پر ان کی رہائی عمل میں آئی تھی۔
