لاہور ( نئی تازہ مانیٹرنگ) سابق وزیراعظم اور پاکستان مسلم لیگ ( ن ) کے صدر شہباز شریف نے کہا ہے کہ ہم الیکشن نہیں عوام اور پاکستان کے معاشی مفادات کی جنگ لڑنے جا رہے ہیں ، اب مہنگائی اور معاشی بدحالی کو شکست دینی ہے،
ان خیالات کا اظہار مسلم لیگ (ن) کے صدر نے پارٹی رہنماؤں اور سابق اراکین قومی و صوبائی اسمبلی سے ملاقاتوں کے دوران کیا۔
سابق وزیراعظم نے کہا کہ سیاسی استحکام سے ہی معیشت اورعوام کے مسائل حل ہوں گے۔ شہباز شریف نے کہا کہ پاکستان اور عوام کی بھلائی او مفاد میں نواز شریف کی قیادت میں سب کو ساتھ لے کر چلیں گے، عوام کو مہنگائی اور دیگر مسائل سے نجات دلانے کے لیے یہ الیکشن بہت اہم ہیں۔
مسلم لیگ (ن) کے صدر نے کہا کہ گالیوں اور کردار کشی جیسے ہتھکنڈوں میں قوم کا قیمتی وقت اور وسائل برباد کیے گئے، عوام اور ملک اس سیاسی انتقام کا نشانہ بن گئے جو ہمارے خلاف شروع کیا گیا تھا،انہوں نے کہا کہ سیاسی انتقام ہار گیا، اب ہمیں مہنگائی اور معاشی بدحالی کو شکست دینی ہے۔
شہباز شریف نے کہا کہ ہم الیکشن نہیں بلکہ عوام اور پاکستان کے معاشی مفادات کی جنگ لڑنے جا رہے ہیں، اللہ کے کرم اورعوام کی مدد سے الیکشن جیت کر مہنگائی کو شکست دیں گے۔
سابق وزیر اعظم نے کہا کہ چار سالہ تباہی کا سیاہ دور نہ آتا تو مہنگائی اور پاکستان کی معاشی بدحالی کا برا وقت نہ آتا۔
مسلم لیگ ن کے سندھ کے صدر بشیر میمن نے بھی شہباز شریف ملاقات کی، اس موقع پرمسلم لیگ ن کے مرکزی صدر نے بشیر میمن کو سندھ کلچر ڈے کی مبارک دی۔ خواجہ سعد رفیق، ایاز صادق، سینیٹر اعظم نذیر تارڑ اور عطاء اللہ تارڑ بھی ملاقات کے دوران موجود تھے۔
ملاقات میں عام انتخابات کی تیاریوں اور صوبہ سندھ میں تنظیمی امور پر مشاورت ہوئی اور سندھ میں ایم کیو ایم اور دیگر جماعتوں کے ساتھ انتخابی ایڈجسٹمنٹ سے متعلق امور پر غور کیا گیا، ملاقات میں اجلاس میں ایم کیو ایم سے ہونے والی گفت و شنید کا جائزہ لیا گیا۔
شیخ روحیل اصغر، محمد حنیف عباسی، خواجہ سلمان رفیق نے بھی پارٹی صدر سے الگ الگ ملاقاتیں کیں۔ سابق رکن قومی اسمبلی چوہدری فرخ الطاف، سید باسط بخاری، میاں عمران قریشی کی بھی شہباز شریف سے ملاقات ہوئی۔
رہنمائوں نے اپنے اپنے حلقوں میں انتخابی تیاریوں سے پارٹی صدر کو آگاہ کیا، شہباز شریف نے انتخابات کی تیاریوں کے لیے پارٹی رہنمائوں اور کارکنوں کے جذبے اور محنت کو سراہا۔
ملاقاتوں میں پارٹی رہنمائوں نے مسلم لیگ ( ن ) کے قائد میاں نواز شریف کی ایون فیلڈ ریفرنس میں بریت پر مبارک باد بھی پیش کی۔
