بنگلورو(نئی تازہ سپورٹس ڈیسک) کرکٹ ورلڈ کپ 2023 کے اہم میچ میں نیوزی لینڈ نے سری لنکا کو 5 وکٹوں سے شکست دے دی۔
جمعرات کوبھارت کے شہر بنگلورو کے ایم چنا سوامی کرکٹ اسٹیڈیم میں کھیلے گئے آئی سی سی مینزورلڈ کپ 2023 کے 41 ویں میچ میں نیوزی لینڈ کے کپتان کین ولیمسن نے ٹاس جیت کر پہلے فیلڈنگ کا فیصلہ کیا۔
سری لنکا کی پوری ٹیم پہلے بیٹنگ کرتے ہوئے 46.4 اوورز میں 171 رنز بنا کر پویلین لوٹ گئی، سری لنکا کی جانب سے کوشل پریرا 51 رنزبنا کر ٹاپ سکورر رہے جبکہ مہیش تھیکشنا 39 رنز بنا کر نمایاں رہے۔
سری لنکن اوپنرز ٹیم کو اچھا آغاز فراہم کرنے میں ناکام رہے، اوپنر پاتھم نسانکا 2، کپتان کوشل مینڈس 6 رنز بنا کر آئوٹ ہوئے۔
چارتھ اسالنکا 8، اینجلو میتھیوز 16، دھننجایا ڈی سلوا 19، چمیکا کرونارتنے 6 رنزجبکہ سدیرا سمارا وکرما اور چمیرا ایک ایک رن بناکر پویلین لوٹ گئے۔ نیوزی لینڈ کی جانب سے ٹرینٹ بولٹ نے 3 ، مچل سینٹنر ، لوکی فرگوسن ، راچن رویندرا نے 2،2 وکٹیں جبکہ ٹم ساؤتھی نے ایک وکٹ حاصل کی۔
172 رنز کا ہدف نیوزی لینڈ کے لیے آسان ثابت ہوا ، اور صرف 23.2 اوورز میں 5 وکٹوں کے نقصان پر حاصل کرلیا، ڈیون کونوے 45، راچن رویندرا 42 اور ڈیرل مچل 43 رنزبنا کر نمایاں رہے۔
اس میچ میں کامیابی کے بعد نیوزی لینڈ کے 10 پوائنٹس ہوگئے ہیں اور اس کے سیمی فائنل کھیلنے کی راہ ہموار ہوگئی ہےجبکہ پاکستان کے لیے سیمی فائنل میں پہنچنا کافی مشکل ہو گیا ہے۔
