لاہور( نئی تازہ مانیٹرنگ) پنجاب حکومت نے العزیزیہ ریفرنس میں سابق وزیراعظم اور مسلم لیگ ن کے قائد نواز شریف کی سزا معطل کردی۔
صوبائی کابینہ نے سرکولیشن کے ذریعے سزا معطلی کی منظوری دی ہے۔
نگران صوبائی وزیر اطلاعات عامر میرکے مطابق نگران کابینہ نے آئینی اختیارات استعمال کرتے ہوئے نواز شریف کی سزا معطل کی، سزا کرمنل پروسیجرل کوڈ کے سیکشن 401 کے تحت معطل کی گئی ہے۔
العزیزیہ کیس میں سزا معطلی کی درخواست نواز شریف کی جانب سے دی گئی تھی۔ ویڈیو لنک پر نواز شریف کے وکیل اعظم نذیر تارڑ اور امجد پرویز نے دلائل دیے۔
نگران پنجاب کابینہ نے ویڈیو لنک پر سماعت کی،چیف سیکریٹری پنجاب بھی کابینہ کے ہمراہ موجود تھے۔ نگران وزیر اطلاعاتنے نجی ٹی وی کو بتایا کہ کیس کا حتمی فیصلہ عدالت ہی کرے گی۔
انہوں نے کہا کہ کرمنل پروسیجرل کوڈ کے سیکشن 401 کے تحت حکومت کو کسی بھی مجرم کی سزامعاف کرنےکا اختیار حاصل ہے، 2019 میں نواز شریف کی لندن روانگی سے قبل بھی سیکشن 401 کے تحت سزا معطل کی گئی تھی۔
احتساب عدالت نے 24 دسمبر 2018 کو سابق وزیراعظم نواز شریف کو العزیزیہ اسٹیل ملز ریفرنس میں7 سال قید اور جرمانے کی سزا سنائی تھی جس کے بعد سابق وزیراعظم کو گرفتار کرکے اڈیالہ جیل منتقل کردیا گیا تھا۔
