اسلام آباد ( نئی تازہ رپورٹ) حکومت نے پیٹرول اورڈیزل کی قیمتوں میں ایک بار پھر اضافہ کردیا ہے جس کے بعد ملکی تاریخ میں پہلی بارپیٹرولیم مصنوعات کی قیمت 300 روپے فی لیٹر سے تجاوز کر گئی ہے۔
فنانس ڈویژن کے مطابق عالمی منڈی میں قیمتوں میں اضافے اور شرح مبادلہ بڑھنے کے باعث حکومت نے پیٹرولیم مصنوعات کی موجودہ قیمتوں میں ردوبدل کا فیصلہ کیا۔
فنانس ڈویژن کے نوٹیفکیشن کے مطابق پٹرول کی فی لیٹر قیمت میں 14.91 روپے جبکہ ڈیزل کی قیمت میں 18.44 روپے فی لیٹر کا اضافہ کیا گیا ہے،نئی ویمتوں کا اطلاق یکم ستمبر سے ہو گا۔
اس اضافے کے بعد ملکی تاریخ میں پہلی بار پیٹرولیم مصنوعات کی فی لیٹر قیمت 300 روپے سے زیادہ ہوگئی۔
نئی قیمتوں کے مطابق پٹرول 305.36 روپے فی لیٹر ، جبکہ ڈیزل 311.84 روپے فی لیٹر میں دستیاب ہو گا۔
اس سے قبل 16 اگست کو بھی نگران حکومت کی جانب سے پیٹرول اور ڈیزل کی فی لیٹر قیمت میں بالترتیب 17 روپے 50 پیسے اور 20 روپے کا اضافہ کیا گیا تھا۔
نگران حکومت نے اقتدار میں آنے کےایک ماہ سے بھی کم عرصہ میں لگاتار دوسری مرتبہ پیٹرولیم مصنوعات کی قیمتوں میں اضافہ کیا ہے۔
