لاہور، کوئٹہ ( نئی تازہ رپورٹ) محکمہ انسداد دہشت گردی (سی ٹی ڈی) نے لاہور اور شیخوپورہ میں کالعدم تنظیم کی 5 دہشتگرد خواتین کو گرفتار کرلیا۔
ترجمان سی ٹی ڈی کے مطابق انٹیلی جنس بیسڈ آپریشنز کے دوران داعش سے تعلق رکھنے والے 5 خواتین دہشت گردوں کی گرفتاری عمل میں آئی۔
محکمہ انسداد دہشت گردی کے بیان میں کہا گیا ہے کہ خفیہ اطلاعات کی بنیاد پر لاہور سے3 اور شخیوپورہ سے 2 خواتین کو گرفتار کیا گیا، دہشتگردوں سے بعض ممنوعہ کتابیں، موبائل فونز، اسلحہ اوررقم برآمد کرلی گئی ہے۔
ادھربلوچستان سے موصولہ اطلاعات کے مطابق کوئٹہ میں کاؤنٹر ٹیررزم ڈیپارٹمنٹ کی اغواکاروں کیخلاف دومختلف کارروائیوں میں 8ملزمان ہلاک ہو گئے۔
ترجمان سی ٹی ڈی کے بیان کے مطابق اغوا برائے تاوان ملزمان کیخلاف کارروائی کے دوران فائرنگ کے تبادلے میں تین اغوا کار مارے گئے جبکہ اغوا کاروں کے قبضے سے ایک مغوی بچہ بازیاب کرالیا گیا ۔
ترجمان سی ٹی ڈی کا کہنا ہے کہ اغواکاروں کے قبضے سے اسلحہ و گولہ بارود برآمد کیا گیا ہے، ہلاک ہونے والے مبینہ اغواء کاروں کا تعلق کالعدم تنظیم سے بتایا جاتا ہے۔
بلوچستان ہی کے ضلع واشک میں ایک الگ کارروائی میں 5 دہشت گرد مارے گئے۔
سی ٹی ڈی کے مطابق کارروائی بسیمہ کے علاقے میں خفیہ اطلاع پر کی گئی، سی ٹی ڈی اہلکاروں نے ایک مکان میں ملزمان کی موجودگی کی اطلاع پر چھاپہ مارا تو وہاں موجود اغواکاروں نے فائرنگ کر دی۔
ترجمان کے مطابق دو طرفہ فائرنگ کے تبادلے میں پانچ ملزمان مارے گئے ، مکان کی تلاشی کے دوران بڑی مقدار میں اسلحہ گولہ و بارود بر آمد کر لیا گیا۔
