اسلام آباد ( نئی تازہ رپورٹ) اقتصادی رابطہ کمیٹی نے 49 ادویات کی قیمتیں بڑھانے کی منظوری دے دی۔ اسٹیبلشمنٹ ڈویژن کو 12 کروڑ 14 لاکھ روپے اور وزارت اطلاعات و نشریات کو70 کروڑروپے فراہم کرنے کی بھی منظوری دے دی گئی ۔
وزیر خزانہ اسحاق ڈار کی زیر صدارت ای سی سی کا اجلاس منگل کو ہوا ، اجلاس میں حیدرآباد- سکھر موٹروے کیلئے ساڑھے نو ارب روپے کی ریاستی گارنٹی اور نیو گوادر بین الااقوامی ائیرپورٹ منصوبے کے لیے 83کروڑ 91 لاکھ روپے کی گرانٹ منظور کی گئی۔
سرکاری بیان کے مطابق اقتصادی رابطہ کمیٹی کے اجلاس میں اسٹیبلشمنٹ ڈویژن کیلئے 12 کروڑ 14 لاکھ روپے ، جبکہ وزارت اطلاعات و نشریات کیلئے 70 کروڑروپے کی منظوری دی گئی ۔
وزیر خزانہ نے ملازمین کی پینشن سے متعلق مسائل حل کرنے کی بھی منظوری دی، وزارت انسانی حقوق کیلئے 11 کروڑ 65 لاکھ اور جامشورو میں کوئلے سے چلنے والے بجلی کے منصوبے کو مکمل کرنے کیلئے 9 ارب 14کروڑ روپے جاری کرنے کی منظوری دی گئی۔
اجلاس میں خیبرپختونخوا میں سابقہ فاٹا کے علاقوں میں لیویز سینٹر کے قیام کیلئے 4کروڑ 70لاکھ، اقوام متحدہ کے امن مشن میں شامل دستوں کیلئے 47 کروڑ اور سانحہ سوات کے شہدا اور زخمیوں کے لیے 4کروڑ 95لاکھ روپے فراہم کرنے کی منظوری دی گئی ۔
کمیٹی نےوزارت پارلیمانی امور کیلئے 4 کروڑ 84 لاکھ اور نیکٹا ہیڈ کوارٹر کی تعمیر کیلئے 11کروڑ روپے جاری کرنے کی منظوری بھی دی ۔
