راولپنڈی ( نئی تازہ رپورٹ) چترال میں پاکستان اورا فغانستان کی سرحد کے قریب دہشت گردوں کا دو پاکستانی چوکیوں پر حملہ سیکیورٹی فورسز نے ناکام بنادیا، 12 حملہ آور دہشت گرد مارے گئے جبکہ چار جوان شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق جدید ترین ہتھیاروں سے لیس دہشت گردوں کے ایک بڑے گروپ نے ضلع چترال کے جنرل علاقے کالاش میں پاک افغان سرحد کے قریب واقع دو پاکستانی فوجی چوکیوں پر حملہ کیا۔ سیکیورٹی فورسز نے دہشت گردوں کے حملے کو ناکام بناتے ہوئے 12 دہشت گردوں کو ہلاک کردیا، جبکہ مقابلے میں پاکستانی فورسز کے چار جوان شہید ہو گئے۔
آئی ایس پی ار کے بیان کے مطابق افغانستان کے نورستان اور کنڑ صوبوں کے گووردیش، پتیگال، برگ متل اور بتاش کے علاقوں میں دہشت گردوں کی نقل و حرکت سے پہلے ہی آگاہ کردیا گیا تھا، پاکستان نے ان معلومات کو عبوری افغان حکومت کے ساتھ بروقت شیئر کیا تھا۔
پاک فوج کے ترجمان کے مطابق خطرے کے بڑھتے ہوئے ماحول کی وجہ سے پاکستانی چوکیاں پہلے ہی ہائی الرٹ پر تھیں، بہادر فوجیوں نے نہایت بہادری سے مقابلہ کیا اور حملوں کو پسپا کرتے ہوئے دہشت گردوں کو بھاری جانی نقصان پہنچایا۔
آئی ایس پی آر کے مطابق علاقے میں کلیئرنس آپریشن جاری ہے تاکہ علاقے میں موجود دیگر دہشت گردوں کو ختم کیا جا سکے۔
آئی ایس پی آر کے مطابق پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں، ہمارے فوجیوں کی ایسی قربانیاں ہمارے عزم کو مزید مضبوط کرتی ہیں۔
ترجمان کے مطابق چترال کے بہادر عوام بھی دہشت گردوں کو علاقے کا امن خراب کرنے کی اجازت نہیں دیں گے۔ عوام سیکورٹی فورسز کے ساتھ مضبوطی سے کھڑے ہیں۔
بیان میں کہا گیا کہ توقع ہے کہ عبوری افغان حکومت اپنی ذمہ داریاں پوری کرے گی اور دہشت گردوں کی جانب سے پاکستان کے خلاف دہشت گردی کی کارروائیوں کے لیے افغان سرزمین کے استعمال کی اجازت نہیں دے گی۔
