اسلام آباد ( نئی تازہ رپورٹ) وزیر اعظم شہباز شریف نے پنجاب الیکشن کے لئے فنڈز جاری کرنے اور مستقبل کی حکمت عملی کے لئے وفاقی کابینہ کا اجلاس آج پیر کو دوبارہ طلب کرلیا گیا۔
اتوار کو وزیراعظم شہبازشریف کی زیر صدارت وفاقی کابینہ کا اجلاسو 2 گھنٹے تک جاری رہا۔ سرکاری بیان کے مطابق کابینہ اجلاس میں 4۔3 کے تناسب سے آنے والے عدالتی حکم اور 4 معزز جج صاحبان کے تفصیلی فیصلے پر غور کیا گیا جبکہ 6 اپریل 2023 کو قومی اسمبلی کی منظور کردہ قرار داد پر تفصیلی مشاورت کی گئی۔
وزیرقانون سینیٹر اعظم نزیر تارڑ نے مختلف آئینی وقانونی اموربارے بریفنگ دی اور کابینہ ارکان کے سوالات کے جواب دیے۔
بیان کے مطابق تمام پہلوؤں کابغور جائزہ لینے اور تفصیلی مشاورت کے بعد کابینہ نے متفقہ طور پر وزارت خزانہ کو ہدایت کی کہ وزارت قانون کی مشاورت سے اس معاملے میں پارلیمان سے راہنمائی حاصل کرنے کے لیے طریقہ کار اور ضابطہ کے مطابق سمری تیار کرے اور پیر کو کابینہ کے اجلاس میں پیش کرے۔
اجلاس میں طے کیا گیا کہ وفاقی کابینہ کا اجلاس پیر 10 اپریل کو دوبارہ طلب کیا جائے تاکہ مستقبل کی حکمت عملی سے متعلق فیصلہ کیا جاسکے۔
