اسلام آباد ( نئی تازہ رپورٹ) وفاقی کابینہ نے کیا ہے کہ پنجاب اسمبلی الیکشن کے لئےفنڈز کا فیصلہ پارلیمنٹ کرے گی۔ اتوار کووزیراعظم شہبازشریف کی زیر صدارت وفاقی کابینہ کا اجلاس دو گھنٹے جاری رہا۔
وزیراعظم شہباز شریف نے لاہور سے ویڈیو لنک پر کابینہ اجلاس کی صدارت کی جبکہ کئی کابینہ اراکین بھی ویڈیولنک کے ذریعے ہی اجلاس میں شریک ہوئے۔ وفاقی وزیر ریاض پیرزادہ، ساجد طوری، وزیراعظم کے مشیر امیر مقام ، وزیر ہاؤسنگ مولانا عبدالواسع، وزیرمملکت ہاشم نوتیزئی نے وزیراعظم ہاؤس پہنچ کر اجلاس میں شرکت کی۔
ذرائع کے مطابق وفاقی وزرا سردار ایاز صادق، سعدرفیق سمیت کابینہ کے چند اراکین ماڈل ٹاؤن لاہور سے شریک ہوئے، وفاقی کابینہ اجلاس میں حکومتی قانونی ٹیم نےبھی شرکت کی، اجلاس میں کئی اہم امور زیر غور لائے گئے۔
وفاقی حکومت کی جانب سے پنجاب الیکشن کے لیے الیکشن کمیشن کو فنڈز دینے یا نہ دینے سے متعلق بھی غور کیا گیا۔
ذرائع کا کہنا ہے کہ وفاقی کابینہ نے ملکی سیاسی و معاشی صورتحال کا جائزہ لیا اور صدر مملکت کے سپریم کورٹ پریکٹس اینڈ پروسیجربل واپس بھجوائے جانے کے معاملہ کا بھی جائزہ لیا۔
ذرائع کا بتانا ہے کہ وفاقی کابینہ کے اجلاس میں پنجاب الیکشن کے لیے فنڈز کی منظوری نہیں دی جا سکی، وفاقی کابینہ نے پنجاب انتخابات فنڈز کا معاملہ قومی اسمبلی بھجوانے کی منظوری دیدی، پنجاب اسمبلی الیکشن کے فنڈز کا فیصلہ پارلیمنٹ کرے گی۔
یاد رہے سپریم کورٹ کے تین رکنی بنچ نے وزارت خزانہ کو پنجاب اسمبلی الیکشن کے لئے 21 ارب روپے الیکشن کمیشن کو دینے کا حکم دیا تھا اور الیکشن کمیشن کو ہدایت کی تھی کہ 11 اپریل تک رپورٹ عدالت میں جمع کرائی جائے۔
