لاہور ( نئی تازہ رپورٹ ) چیئرمین پی ٹی آئی عمران خان اور دیگر رہنماؤں کیخلاف دہشتگردی سمیت متعدد دفعات کےتحت نیا مقدمہ درج کرلیا گیا۔
مقدمہ لاہور کے تھانہ ریس کورس میں انسپکٹرریحان انور کی مدعیت میں درج کیا گیا ہے۔ ایف آئی آر کے مطابق اسلام آباد پولیس کے ڈی آئی جی سمیت پولیس کے کئی اہلکاروں اور افسران پر حملہ کیا گیا۔
ایف آئی آر کے متن میں کہا گیا کہ تحریک انصاف کے رہنماؤں اور کارکنوں نے عمران خان کے اکسانے پر حملہ کیا اورپٹرول بموں سے سرکاری گاڑیوں کو نقصان پہنچایا گیا۔
مقدمہ میں ٹریفک روکنے اور خوف و ہراس پھیلانے، جان سےمارنےکی کوشش میں زخمی کرنے کی دفعہ 324بھی لگا ئی گئی ہے جبکہ کارسرکارمیں مداخلت، مجرموں کو پناہ دینے کی دفعات بھی ایف آئی آر میں شامل ہیں۔
ایف آئی آر کے مطابق نامزد ملزمان عوام کےليے مشکلات اور پریشانی پیدا کرنے کا موجب بنے۔ مقدمہ میں عمران خان اور ان کے ساتھیوں کے خلاف مجرمانہ سازش کی دفعہ بھی شامل کی گئی ہے ۔
