راولپنڈی:پاکستان سپر لیگ (پی ایس ایل) سیزن 10 کے 29ویں گروپ میچ میں لاہور قلندرز نے پشاور زلمی کو 26 رنز سے شکست دے کر پلے آف مرحلے میں جگہ بنالی، جس کے بعد لیگ کے ناک آؤٹ مرحلے میں پہنچنے والی چاروں ٹیموں کا فیصلہ بھی ہوگیا۔
اتوار کو کھیلا گیا یہ میچ آندھی اور بارش کے باعث تاخیر سے شروع ہوا اور اننگز کو 13 اوورز تک محدود کر دیا گیا۔ پشاور زلمی نے ٹاس جیت کر پہلے فیلڈنگ کا فیصلہ کیا۔
لاہور قلندرز نے فخر زمان کی 60 رنز کی جارحانہ اننگز کی بدولت 8 وکٹوں کے نقصان پر 149 رنز بنائے۔ قلندرز کا آغاز شاندار رہا اور ابتدائی 3 اوورز میں بغیر کسی نقصان کے 49 رنز بنائے گئے۔ زلمی کی ناقص فیلڈنگ نے لاہور کو مزید فائدہ پہنچایا۔
زلمی کی جانب سے احمد دانیال، ڈینئیل سیمز اور سکندر رضا نے 2،2 وکٹیں حاصل کیں۔
150 رنز کے ہدف کے تعاقب میں پشاور زلمی کی ٹیم ابتداء سے ہی دباؤ کا شکار نظر آئی۔ صرف 53 رنز پر آدھی ٹیم پویلین لوٹ چکی تھی۔ کسی بھی بلے باز نے وکٹ پر دیر تک قیام نہ کیا اور پوری ٹیم مقررہ 13 اوورز میں 8 وکٹوں پر صرف 123 رنز بنا سکی۔ ڈینیئل سیمز 26 اور احمد دانیال 24 رنز کے ساتھ نمایاں رہے، جبکہ چھ بلے باز ڈبل فیگر میں بھی داخل نہ ہو سکے۔
لاہور کی جانب سے سلمان مرزا نے 4، شاہین شاہ آفریدی نے 2 جبکہ سکندر رضا اور حارث رؤف نے ایک، ایک کھلاڑی کو آؤٹ کیا۔
اس فتح کے ساتھ ہی لاہور قلندرز نے پلے آف میں جگہ بنا لی۔ اس سے قبل کراچی کنگز، اسلام آباد یونائیٹڈ اور کوئٹہ گلیڈی ایٹرز پہلے ہی اگلے مرحلے میں پہنچ چکی تھیں۔
پشاور زلمی اور ملتان سلطانز کا سفر ختم ہوگیا۔ بابر اعظم کی قیادت میں پشاور زلمی پہلی مرتبہ پی ایس ایل کے پلے آف مرحلے میں رسائی حاصل کرنے میں ناکام رہی، جبکہ ملتان سلطانز پہلے ہی اس دوڑ سے باہر ہوچکی تھی۔
پوائنٹس ٹیبل کی صورتحال:
کوئٹہ گلیڈی ایٹرز 10 میچز میں 15 پوائنٹس کے ساتھ سرفہرست ہے۔
کراچی کنگز 9 میچز میں 12 پوائنٹس کے ساتھ دوسرے نمبر پر ہے۔
لاہور قلندرز 10 میچز میں 11 پوائنٹس کے ساتھ تیسرے نمبر پر ہے۔
اسلام آباد یونائیٹڈ 9 میچز میں 10 پوائنٹس کے ساتھ چوتھی پوزیشن پر موجود ہے۔
پشاور زلمی نے 10 میچز میں 10 پوائنٹس حاصل کیے اور پوائنٹس ٹیبل پر پانچویں نمبر پر رہی، جبکہ ملتان سلطانز نے صرف 2 پوائنٹس کے ساتھ چھٹی پوزیشن حاصل کی۔ دونوں ٹیمیں ٹورنامنٹ سے باہر ہو چکی ہیں۔
واضح رہے کہ لیگ مرحلے کا آخری میچ پیر کو کراچی کنگز اور اسلام آباد یونائیٹڈ کے درمیان کھیلا جائے گا، جس کے بعد پلے آف مرحلے کی حتمی لائن اپ اور ٹاکرے طے ہوں گے۔
