راولپنڈی( نئی تازہ سپورٹس ڈیسک) پی ایس ایل 8 کے اہم میچ میں ملتان سلطانز نےدلچسپ مقابلے کے بعد کوئٹہ گلیڈی ایٹرز کو 9 رنز سے شسکت دیکر پلے آف کی دوڑ سے باہر کردیا۔
راولپنڈی کرکٹ گراؤنڈ میں کھیلے گئے پاکستان سپر لیگ کے 28 ویں اور اہم میچ میں کوئٹہ گلیڈی ایٹرز کے کپتان محمد نواز نے ٹاس جیت کر پہلے فیلڈنگ کا فیصلہ کیا۔
کوئٹہ گلیڈی ایٹرز کی دعوت پر پہلے بیٹنگ کرتے ہوئے ملتان سلطانز نے مقررہ 20 اوورز میں 3 وکٹوں کے نقصان پر 262 رنز اسکور کیے۔ملتان سلطانز کی جانب سے عثمان خان نے 43 گیندوں پر 120 رنز کی ریکارڈ ساز اننگ کھیلی۔
کپتان محمد رضوان 55 اور رائلی روسی 15 رنز بنا کر آؤٹ ہوئے۔ ٹم ڈیوڈ 43 اور کیرون پولارڈ 23 رنز کے ساتھ ناٹ آؤٹ رہے۔گلیڈی ایٹرز کے قیس احمد نے 2 جبکہ کپتان محمد نواز نے ایک کھلاڑی کو آئوٹ کیا۔
کوئٹہ گلیڈی ایٹرز نے263 رنز کے بڑے ہدف کےتعاقب میں مقررہ 20 اوورز میں 8 وکٹوں کے نقصان پر253 رنز بنائے۔
کوئٹہ گلیڈی ایٹرز کی جانب سے عمیر یوسف 67 نے اور افتخار احمد نے 53 رنز بنا ئے۔ مارٹن گپٹل 37، عمر اکمل 28 اور کپتان محمد نواز 16 رنز بنا کر آؤٹ ہوئے۔ جبکہ قیس احمد اور نوین الحق 17، 17 رنز کے ساتھ ناٹ آؤٹ پویلین لوٹے۔
ملتان سلطانز کی جانب سے عباس آفریدی نے پانچ وکٹیں حاصل کیں اور ساتھ ہی پی ایس ایل 8 کی پہلی ہیٹ ٹرک بھی اپنے نام کی، احسان اللہ نے 2 اور انور علی نے ایک کھلاڑی کو آئوٹ کیا۔ ملتان سلطانز سے شکست کے بعد کوئٹہ گلیڈی ایٹرز پلے آف کی دوڑ سے باہر ہوگئی۔ جبکہ پشاور زلمی نے پلے آف مرحلے میں رسائی حاصل کرلی ہے۔
