اسلام آباد ( نئی تازہ رپورٹ ) پاکستان الیکٹرانک میڈیا ریگولیٹری اتھارٹی(پیمرا) نےچیئرمین پاکستان تحریک انصاف عمران خان کی تقاریر اور بیانات نشر کرنے پر پابندی عائد کردی ہے۔
پیمرا کی جانب سے ٹی وی چینلز کو ہدایات جاری کی گئی ہیں کہ عمران خان کے ریاستی اداروں کے خلاف ریکارڈ شدہ بیانات، لائیو گفتگو یا پریس کانفرنس نشر نہ کی جائے۔بیان میں کہاگیا کہ چیئرمین پی ٹی آئی اپنی تقاریر اور بیانات میں ریاستی اداروں پر مسلسل بے بنیاد الزامات عائد کررہے ہیں اور اداروں اور ا ن کے افسران کے خلاف اپنے اشتعال انگیز بیانات سے منافرت پھیلا رہے ہیں جس سے امن عامہ کی صورتحال خراب ہونے کا اندیشہ ہے۔
پیمرا نے کہا کہ ریاستی اداروں اور افسران کے خلاف الزامات، نفرت انگیز بیانات، بہتان تراشی اور بلاجواز بیانات آئین کے آرٹیکل 19 کے علاوہ سپریم کورٹ اور ہائی کورٹس کے فیصلوں کی بھی خلاف ورزی ہے۔
بیان میں کہا گیا کہ تقاریر اور بیانات کے مواد کے بغور جائزے اور پیمرا قوانین کی مسلسل خلاف ورزیوں کو دیکھتے ہوئے پیمرا آرڈیننس 2002 کے سیکشن 27(اے) کے تحت تمام سیٹلائٹ چینلز پر عمران خان کے بیانات اور تقاریر کی نشریات، ریکارڈ شدہ یا لائیو بیانات اور پریس کانفرنس نشر کرنے پر پابندی عائد کی جاتی ہے۔
پیمرا نے تمام ٹی وی چینلز کو مزید ہدایت کی ہےکہ وہ اس بات کو بھی یقینی بنائیں کہ کوئی بھی فرد ان کا پلیٹ فارم ریاستی اداروں کے خلاف ہتک آمیز بیان بازی کے لیے استعمال نہ کرے۔ اتھارٹی نے خبردار کیا کہ ان احکامات کی خلاف ورزی کی صورت میں پمرا آرڈیننس کے سیکشن 30(3) کے تحت چینل کا لائسنس کسی شوکاز نوٹس کے بغیر ہی معطل کردیا جائے گا۔
