لاہور ( نئی تازہ رپورٹ) ٹی وی،فلم اور سٹیج کے معروف اداکار محمد قوی خان 80برس کی عمر میں کینیڈا میں انتقال کر گئے۔اداکار قوی خان کینسر کے عارضے میں مبتلا تھے، وہ گذشتہ تین ماہ سے کینیڈاکے اسپتال میں زیر علاج تھے۔۔ ان کی اہلیہ کچھ روز قبل ان سے ملنے کینیڈا گئیں تھیں،
1942میں پشاور میں پیدا ہو نے والے قوی خان نے ٹی وی، تھیٹرز، فلموں اور ریڈیو میں اپنے فن کے جوہر دکھائے ہیں۔ انہیں پرائیڈ آف پرفارمنس اور ستارہ امتیاز سے بھی نوازا گیا جبکہ حکومت کی طرف سے رواں سال انہیں پاکستان کے سب سے بڑے ایوارڈ نشان پاکستان کیلئے بھی نامزد کیا گیاتھا ، قوی خان کو ریڈیو اور پاکستان ٹیلی ویژن نے لائف ٹائم اجیومنٹ ایوارڈ سے نوازا ۔اداکار قومی خان نےاندھیرا اجالا، الف نون، دن، انگار وادی، آشیانہ جیسے ڈراموں میں کام کیا اور ٹائیگر گینگ، مٹی کے پتلے، سوسائٹی گر، بیگم جان، سرفروش جیسی فلموں میں اداکاری کے جوہر دکھائے۔قوی خان کے بیٹے عدنان قوی خان نے نجی ٹی وی سے گفتگو میں والد کے انتقال کی تصدیق کرتے ہوئے بتایا کہ وہ جگر کے کینسر میں مبتلا تھے۔
وزیراعظم شہبازشریف نے ان کے انتقال پر افسوس کا اظہار کرتے ہوئے مرحوم کی مغفرت اور لواحقین کے لیے صبر جمیل کی دعا کی اور کہا کہ قوی خان نے فلم، ٹی وی،اسٹیج اور ریڈیو پر اپنے فن کا لوہا منوایا، تمغہ حسن کارکردگی اور ستارہ امتیاز قوی خان کی صلاحیتوں کا ریاستی اعتراف ہے۔ ان کی وفات پاکستان کے فن کے شعبے کا ناقابل تلافی نقصان ہے۔
