لاہور (نئی تازہ رپورٹ) تھریک انصاف کی جیل بھرو تحریک میں لاہور سے گرفتار ہونے والے پی ٹی آئی رہنماؤں کی رہائی کیلئے لاہور ہائیکورٹ میں درخواستیں دائر کر دی گئیں۔شاہ محمود قریشی کے بیٹے زین قریشی نے اپنے والد کو عدالت میں پیش کروانے کیلئے درخواست دائر کر دی ہے۔درخواست میں موقف اختیار کیا گیا گیا ہے کہ شاہ محمود قریشی کو حبس بے جا میں رکھا گیا ہے، ان کو کل حراست میں لیا گیا تھا اورنہیں بتایا جا رہا وہ کہاں ہیں۔
اسی طرح اسد عمر، عمر سرفراز چیمہ، ولید اقبال، اعظم سواتی کی بازیابی کیلئے بھی درخواستیں دائر کی گئی ہیں،جبکہ علاوہ ڈاکٹر مراد راس، جان مدنی، اعظم نیازی اور احسان ڈوگر کی رہائی اور بازیابی کیلئے بھی عدالت سے رجوع کیا گیا ہے۔پی ٹی آئی رہنماؤں کی بازیابی کی درخواست تحریک انصاف کے رہنما اعجاز چوہدری کی طرف سے دائر کی گئی ہے۔
درخواست میں ایڈیشنل چیف سیکریٹری ہوم، آئی جی اور سی سی پی او کو فریق بنایا گیا ہے۔
درخواست میں کہا گیا ہے کہ آئی جی اور سی سی پی او نے تحریک انصاف کے قائدین کو گرفتار کیا، قائدین کو مال روڈ سے پکڑ کر پہلے کیمپ جیل پھر کوٹ لکھپت جیل لے جایا گیا، انہیں کھانا اور دوائیاں بھی فراہم نہیں کرنے دی گئیں۔ اعجاز چوھدری کے مطابق پارٹی رہنمائوں کو غیر قانونی حراست میں رکھا گیا ہے، شہرت اور ذات کو نقصان پہنچانے کیلئے جھوٹے کیس بنائے جا سکتے ہیں، رہنماؤں اور کارکنوں کو حراست میں رکھنے کا کوئی قانونی جواز نہیں۔ رہنماؤں کو بازیاب کرکے پولیس کو غیرقانونی اقدام سے باز رہنے کا حکم دیا جائے۔ جسٹس شہرام سرور درخواست پر جمعہ کو سماعت کریں گے۔ شاہ محمود قریشی اور اعظم سواتی کے بیٹوں کی درخواستوں میں رہائی کی استدعا کی گئی ہے، جبکہ ولید اقبال کی اہلیہ کی جانب سے درخواست میں بھی رہائی کی استدعا کی گئی ہے۔
