کراچی (نئی تازہ مانیٹرنگ) بلند لاگت اور کمزور شرح مبادلہ کی وجہ سے ٹیلی کام سیکٹر نے حکومت سے ٹیرف میں اضافے کا مطالبہ کردیا۔میڈیا رپورٹ کے مطابق معاشی بحران نے ٹیلی کام سیکٹر کو بھی لپیٹ میں لے لیا ہے، موبائل کمپنیوں نے کہا ہے موجودہ آمدن کے ساتھ پاکستان میں خدمات جاری رکھنا مشکل ہو چکا ہے۔
ر پورٹ کے مطابق ٹیلی کام سیکٹر کا مالی بحران شدت اختیار کرگیا ہے، شرح سود، ایندھن اور بجلی کی قیمتوں میں اضافے کے باعث کاروباری لاگت بھی کئی گنا بڑھ چکی ہے جس کے بعد موبائل فون سروسز فراہم کرنے والی کمپنیوں نے ٹیرف میں اضافے کے لیے کوششیں شروع کردی ہیں۔
ٹیلی کام کمپنیوں کے ایک وفد نے وزیر انفارمیشن ٹیکنالوجی سید امین الحق سے ملاقات کی اور انہیں موبائل کمپنیوں کو درپیش بحرانی سورتحال سے آگاہ کیا ۔ وفد میں جاز، پی ٹی سی ایل اور ٹیلی نار کے سربراہان شامل تھے۔ٹیلی کام کمپنیوں کے وفد نے وفاقی وزیر کو آگاہ کیا کہ ایل سی کی بندش، مالی بحران اور موبائلٹیرف بڑھانے پر عائد پابندیوں کے باعث سروس کا معیار بری طرح متاثر ہو سکتا ہے۔
انڈسٹری ذرائع کے مطابق کاروباری مشکلات برقرار رہیں تو خدمات کی فراہمی جاری رکھنا ممکن نہیں ہوگا۔ٹیلی کام کمپنیوں نے وفاقی وزیر کو خدشات سے آگاہ کیا اور بتایا کہ ٹیلی کام کمپنیوں کی اوسط صارف آمدنی دنیا کی پست ترین سطح پر آچکی ہے، عالمی اوسط 8 ڈالر جبکہ پاکستان میں فی صارف آمدنی صرف 80 سینٹ کی سطح پر آگئی ہے۔
