گوجرانوالہ (نئی تازہ مانیٹرنگ) انسداد دہشتگردی کی عدالت نے وفاقی وزیر داخلہ رانا ثنااللہ کے وارنٹ گرفتاری جاری کر تے ہوئے 7 مارچ کو پیش کرنے کی ہدایت کی ہے۔
انسداد دہشتگردی کی عدالت نے گجرات کے تھانہ انڈسٹریل میں رانا ثنا اللہ کے خلاف درج ایک مقدمے میں ان کے قابل ضمانت وارنٹ گرفتاری جاری کیے۔یاد رہے کہ رانا ثنا اللہ کے خلاف 5 اگست 2022 کو (ق) لیگ کے مقامی رہنما شاہ کاز اسلم کی مدعیت میں انسداد دہشتگردی کی دفعات کے تحت مقدمہ درج کیاگیا تھا جس میں ان پر چیف سیکرٹری اور ان کے اہلخانہ کوجان سے مارنے کی دھمکیاں دینے کا الزام عائد کیا گیاہے۔
انسداد دہشت گردی عدالت کے جج رانا زاہد اقبال نے رانا ثنا اللہ کے خلاف درج مقدمے کی سماعت کی۔گجرات پولیس نے مقدمے کی تفتیش مکمل کر کے اخراج رپورٹ عدالت میں پیش کی تھی تاہم عدالت نے پولیس کی اخراج رپورٹ کو مسترد کرتے ہوئے وفاقی وزیر داخلہ کے قابل ضمانت وارنٹ گرفتاری جاری کیے ہیں۔عدالت نے تفتیشی افسر، متعلقہ ڈی ایس پی اور ایس پی انویسٹی گیشن کو شوکاز نوٹس جاری کرتے ہوئے 7 مارچ کو ذاتی حیثیت میں پیش ہونے کا بھی حکم دیا ہے۔
