کوئٹہ ( نئی تازہ مانیٹرنگ ) صوبائی وزیر سردار عبدالرحمان کھیتران کو قتل کے مقدمہ میں کوئٹہ سے حراست میں لے لیا گیا۔ ان پر بارکھان میں خاتون سمیت 3 افراد کے قتل کا الزام ہے۔
بلوچستان پولیس کے مطابق صوبائی وزیر سردار عبدالرحمان کھیتران کو بارکھان میں خاتون سمیت 3 افراد کے قتل کے الزام میں کوئٹہ سے حراست میں لیا گیا ہے۔آئی جی پولیس بلوچستان کے مطابق سردار عبدالرحمان کھیتران کو شامل تفتیش کیا گیا ہے، اسپیشل انویسٹی گیشن ٹیم صوبائی وزیر سے تفتیش کر رہی ہے۔
آئی جی نے کہا ہے کہ مقتول خاندان سے تعلق رکھنے والے دیگر مغویوں کی بازیابی کیلئے چھاپے مارے جارہے ہیں، قتل کے واقعے میں مزید گرفتاریاں بھی متوقع ہیں۔ دو روز قبل بلوچستان کے علاقے بارکھان میں ایک کنویں سے خاتون سمیت 3 افراد کی لاشیں ملی تھیں، جس کے بعد مری قبیلے نے لاشوں کے ہمراہ کوئٹہ میں دھرنا دیدیا۔
مقتولین کے ورثاء نے الزام لگایا کہ خاتون سمیت تینوں افراد کو صوبائی وزیر عبدالرحمان کھیتران نے قتل کروایا ہے۔سردار عبدالرحمان کھیتران نے واقعے سے لاتعلقی کا اظہار کرتے ہوئے کہا تھا جب واقعہ پیش آیا میں کوئٹہ میں تھا، اس سے میرا کوئی تعلق نہیں۔
