لکی مروت ( نئی تازہ مانیٹرنگ) پولیس اور محکمہ انسداد دہشت گردی (سی ٹی ڈی) نے خفیہ اطلاع کی بنیاد پر مشترکہ آپریشن کرتے ہوئے میں کالعدم تحریک طالبان کے 6 مبینہ دہشت گرد ہلاک کر دیئے۔
لکی مروت پولیس کے ترجمان شاہد حمید کے مطابق پولیس اور سی ٹی ڈی نے دہشت گردوں کی تھانہ ڈاڈیوالہ کی حدود میں موجودگی کی اطلاع پر کارروائی کی۔یہ دہشت گرد مختلف بم حملوں اور دہشت گردی کی وارداتوں میں ملوث تھے۔ ترجمان نے بتایا کہ پولیس کو اطلاع ملی تھی کہ دہشت گرد چوکی عباسہ پر حملے کا منصوبہ بنارہے ہیں، اس اطلاع پر لکی مروت پولیس اور سی ٹی ڈی بنوں کی ٹیم دہشت گردوں کے ٹھکانوں پر آپریشن کے لیے پہنچی جہاںکافی دیر تک فائرنگ کا تبادلہ جاری رہا، فائرنگ رکنے پر پولیس نے تلاش شروع کی تو 6 دہشت گرد مارے جا چکے تھے، جن کے پاس سے اسلحہ، گولہ بارود اور دستی بم بھی ملے ہیں۔
ترجمان کے مطابق مارے گئے 6 مبینہ دہشت گردوں میںسے چار کی شناخت ضیا اللہ عرف کوچی ولد داود، صفت اللہ عرف ڈرون ولد حیات اللہ، محیب اللہ ولد شریف اور کلیم اللہ عرف فقیر ولد امیرنواز سے ہوئی جبکہ باقی ہلاک 2 دہشت گردوں کی شناخت کا عمل جاری ہے۔
پولیس ذرائع کے مطابق ہلاک دہشت گرد کالعدم ٹی ٹی پی کے سر گرم ارکان تھے۔ جوپولیس پرحملوں اور دہشت گردی کے واقعات میں لکی مروت پولیس اور محکمہ انسداد دہشت گردی کو مطلوب تھے۔ یاد رہے کہ نومبر 2022 میں دہشت گردوں نے چوکی عباسہ کی پولیس موبائل گاڑی پرحملہ کیا تھا جس میں پولیس کے 6 اہلکارشہید ہو ئے تھے۔
