اسلام اباد ( نئی تازہ رپورٹ)وزیراعظم شہباز شریف کے احکامات پر پاکستان میں آن لائن انسائیکلوپیڈیا وکی پیڈیا کو بحال کر دیا گیا۔ وزیراعظم آفس سے جاری بیان میں کہا گیا ہے کہ وکی پیڈیا پر پابندی کا معاملہ وزیراعظم کے سامنے رکھا گیا تھا اور انہوں نے اس پر وزیرقانون، وزیر اقتصادی امور اور وزیراطلاعات پر مشتمل ایک کمیٹی تشکیل دے دی تھی۔ بیان کے مطابق مذ کورہ کمیٹی کا اجلاس منعقد کیا گیا جس میں ارکان نے عوام، طلبہ اور اساتذہ کی معلومات اور آگاہی کے لیے وکی پیڈیا کے کارآمد ہونے سے متعلق چیزیں اجاگر کیں۔
بیان میں کہا گیا کہ مخصوص معلومات تک رسائی روکنے کے لیے وکی پیڈیا پر مکمل پابندی عائد کرنا مناسب اقدام نہیں ہے اور اس کی بندش سے پڑنے والے غیر ارادی اثرات اس کے فوائد کو زائل کردیتے ہیں۔وزیراعظم نے تجاویز کی بنیاد پر ویب سائٹ کو فوری طور پر بحال کر نے کا حکم دیا اور اور وزیر انفارمیشن اینڈ ٹیکنالوجی امین الحق کی سربراہی میں وزیرقانون، وزیراطلاعات، وزیر تجارت اور وزیرمواصلات پر مشتمل ایک الگ کمیٹی تشکیل دی۔ کابینہ کمیٹی پی ٹی اے کی جانب سے وکی پیڈیا بلاک کرنے کے اقدام کے حوالے سے جائزہ لے گی۔
یہ بھی پڑھین: توہین آمیز مواد نہ ہٹانے پر پاکستان میں وکی پیڈیا بلاک
بیان میں کہا گیا ہے کہ کابینہ کمیٹی ہماری معاشرتی، ثقافتی اور مذہبی حساسیت کو مدنظر رکھ کر وکی پیڈیا اور دیگر آن لان ویب سائٹس پر موجود قابل اعتراض مواد ہٹانے یا بلاک کرنے کے لیے متبادل تکنیکی اقدامات اور تجاویز پیش کرے گی۔ بیان کے مطابق مذکورہ کمیٹی متوازن انداز میں غیرقانونی آن لائن مواد روکنے کی مقصد کے تحت دیگر تجاویز بھی پیش کرے گی۔وزارت انفارمیشن اینڈ ٹیکنالوجی اس حوالے سے کابینہ کمیٹی کو تعاون فراہم کرے گی۔بیان میں بتایا گیا کہ کمیٹی ایک ہفتے کے اندر اپنی رپورٹ تجاویز کے ساتھ وفاقی کابینہ کو غور کے لیے ارسال کرےگی۔ یاد رہے کہ چند روز قبل پاکستان ٹیلی کمیونکیشن اتھارٹی (پی ٹی اے) نے توہین آمیز مواد نہ ہٹانے پر پاکستان میں وکی پیڈیا کو بلاک کردیا تھا۔
