لاہور (نئی تازہ نیوز)پاکستان تحریک انصاف کے چیئرمین عمران خان نے کہا ہے کہ جیل بھرو تحریک کی تاریخ رضا کاروں کی رجسٹریشن کے بعد دوں گا۔ عمران خان نے اپنے ویڈیو بیان میں کہا کہ جب سے یہ حکومت آئی ہے ملک کے آئین اور قانون کی دھجیاں اڑائی گئی ہیں، عدالتوں کے احکامات نہ پولیس اور نہ ہی یہ ریاست سنتی ہے، وفاقی حکومت اسلام آباد کے بلدیاتی الیکشن سے بھی بھاگ رہی ہے ۔
عمران خان نے کہا کہ 25 مئی کو ہمارے پرامن احتجاج پر ظلم کیا گیا، قوم کا آئین اور قانون پر اعتماد اٹھتا جا رہا ہے، ہم نے اس لیے 2 اسمبلیاں ختم کیں کہ ملک عدم استحکام کا شکار ہے، 25 دن ہو گئے اب تک الیکشن کے لیے کوئی تاریخ نہیں دی گئی، الیکشن کی تاریخ نہ دینا آئین کی خلاف ورزی ہے۔
چیئرمین پی ٹی آئی نے کہا کہ پنجاب اور خیبرپختونخوا کے الیکشن 90 دن سے آگے گئے تو جیل بھرو تحریک شروع کریں گے،انہوں نے کارکنوں سے کہا کہ ضلعی صدور کے پاس رجسٹریشن شروع کریں، ہم پاکستان کے ہر شہر میں جیل بھرو تحریک شروع کریں گے دونوں صوبوں کے انتخابات 90 دن سے آگے لے جانا آئین کی خلاف ورزی ہو گا، الیکشن آئینی مدت سے آگے لے جانے والوں کیخلاف آرٹیکل 6 لگے گا۔ عمران خان نے کہا کہ کسی نظریہ ضرورت کی طرف جانا تباہ کن ہو گا، جسٹس منیر کے نظریہ ضرورت کے فیصلے سے ہی پاکستان میں خرابیوں کا آغاز ہوا تھا۔
چیئرمین پی ٹی آئی نے کہا کہ کرپشن کرنے والوں پر تو جیل میں کوئی تشدد نہیں ہوا، انہیں سہولیات دی جاتی تھیں، ان کے ہینڈلرز کو بتایا تھا کہ سازش سے حکومت ختم کی تو پھر ان سے حالات نہیں سنبھلیں گے، کارکنوں اور عوام کو بھی کہتا ہوں یہ سیاست نہیں حقیقی آزادی کی جنگ ہے۔
