اسلام آباد ( نئی تازہ رپورٹ) عدالت نے پی ٹی آئی رہنما فواد چودھری کے مزید جسمانی ریمانڈ کی استدعا مسترد کرتے ہوئے انہیں 14 روزہ جوڈیشل ریمانڈ پر اڈیالہ جیل بھیجنے کا حکم دے دیا۔
جمعہ کو فواد چودھری کو 2 روزہ جسمانی ریمانڈ مکمل ہونے پر جوڈیشل مجسٹریٹ وقاص راجا کی عدالت میں پیش کیا گیا۔
دوران سماعت پولیس اور پراسیکیوٹر نے ان کے مزید جسمانی ریمانڈ کی استدعا کی ۔جوڈیشل مجسٹریٹ وقاص احمد نے درخواست پر فیصلہ محفوظ کیا اور بعد ازاں فواد چودھری کو 14 روزہ جودیشل ریمانڈ پر جیل بھیجنے کا حکم دیا۔
جوڈیشل مجسٹریٹ وقاص احمد راجا نے محفوظ فیصلہ سنایا.
عدالتی حکم کے فوری بعد پی ٹی آئی نے فواد چودھری کی ضمانت دائر کرنے کا فیصلہ کرلیا۔ اس سلسلے میں وکیل فیصل چودھری نے کہا کہ ہم کچھ ہی دیر میں درخواست ضمانت دائر کردیں گے۔
قبل ازیں سماعت شروع ہوتے ہی پراسیکیوٹر نے دلائل کا آغاز کیا اور عدالت کو ایف آئی آر پڑھتے ہوئے بتایا کہ چیف الیکشن کمشنر ، نگراں وزیر اعلیٰ کے خلاف یہ زبان استعمال کی گئی۔ رجیم چینج کے پیچھے یہ بیانیہ لے کر چل رہے ہیں۔ ہم نے فواد چودھری کی وائس میچ کرا لی ہے ۔ فوٹو گرا میٹری ٹیسٹ کرانا ہے۔ ابھی برآمدگی بھی کرنی ہیں۔ پراسیکیوٹر نے شہباز گل کیس میں ہائی کورٹ کا فیصلہ بھی پڑھ کر سنایا۔ اس موقع پر وکیل بابر اعون نے فواد چوہدری کے حق میں دلائل دیئے.
